Интернетдан қўрқиш касаллиги

Ўзбекистон нашрларини кузатиб, интернет тўғрисида турли ваҳималар, унинг зарарини кўпиртириб кўрсатиш барча нодемократик тузумлардаги матбуотга хос хусусият, деган тўхтамга келиш мумкин.

Ўзбек матбуотида ҳар куни бўлмаса-да, кунора интернетнинг зарари ҳақида мақолалар эълон қилиниб туришини аввал ҳам айтгандик. Уларда кўпроқ интернетнинг «миллий мафкурага салбий таъсири, бузғунчиликни тарғиб қилиши» ҳақида сўз борарди.

Бу сафар эса «Миллий тикланиш» газетаси (12.10) нейрохирургия соҳаси профессори Ортиқбой Эрназаровга таяниб, «интернет шахсда фикрий ривожланишни, мушоҳада, таҳлил қилиш, қобилиятини, изланувчанлик ва хотирани сусайтиради», дея хулоса чиқарди.

Газетада ёзилишича, ўзбекчада «чуғурламоқ», «валжирамоқ» маъноларини англатувчи «Twitter» ижтимоий тармоғида «ахборотлар ҳеч бир масъулиятсиз (асос-далилсиз, ёлғон-яшиқ, миш-мишлар) тарқатилишини кузатиш мумкин».

Албатта, интернетнинг ҳамма жиҳатларини ҳам яхши деб бўлмайди. Чунки унда зарарли ахборотлар ҳам кўп.

Аммо ўзбек матбуотидаги мақолалардан уларнинг муаллифлари аслида интернетнинг эркин фикрлашга ўргатиш, мавжуд тузумнинг салбий хатти-ҳаракатларидан аҳолини хабардор қилиш қудратидан қўрқаётганини сезиш қийин эмас.

Баҳодир Шариф
Ўзбекистонлик газетхон таҳаллуси
Eltuz.com