Ғўс қишлоғида номус масаласи ғалаёнга сабаб бўлди

Cамарқанднинг Ургут тумани Ғўс қишлоғида 21 июль куни бошланган норозилик ғалаёни 4 кун давом этди, автоматлар билан қуролланган кучишлатар тизим ходимлари томонидан бостирилди. Воқеада жароҳатланганлар, ҳибсга олинганлар борлиги айтилмоқда. «Элтуз» Ғўс қишлоғининг айни воқеаларни кузатган турғуни билан суҳбатлашди.

«Элтуз» суҳбатдошига кўра, норозиликларнинг жиддий тус олишига фуқароларнинг ички ишлар идораларига қилган мурожаати инобатга олинмагани сабаб бўлган. Халқ кўтарилишидан олдин Ғўс қишлоғининг ўндан ортиқ фуқароси ИИБ участка нозирлари Ш.Абдураҳмонов ва Фарруҳ Мамаашуровга ёзма ва оғзаки мурожаат қилишган, лекин ИИБнинг бу икки ходими уларнинг арзини тингламай, одамларни пўписа қилиб хайдашган.

Воқеа гувоҳига кўра, ўзаро жанжал аввалига телеграм ижтимоий тармоғида ўзбек эркакларининг ор-номуси масаласидаги даҳанаки ва ҳақоратли чиқишлардан бошланган. Гўёки бу қишлоқда фақат ҳар ким билан ётишга тайёр бева аёллар қолган, эркаклар эса Россияда мардикорликда юрибди, деган гаплар тарқалган.

ИИБ 23 июль куни тарқатган баёнотга кўра, ғўсликларни ҳақорат қилган шахс ҳибсга олинган. Унинг кечирим сўраган видеоси тармоқларга жойлаштирилган.

Бироқ «Элтуз» суҳбатдошига кўра, шундан сўнг ҳам халқ тўпланишда давом этган, уларга қарши ҳимоя воситалари ва автоматлар билан қуролланган ҳарбийлар ташланган. Огоҳлантириш учун ўқ отилган.

«Элтуз» суҳбатдоши ИИБ вакиллари воқеанинг юздан ортиқ гувоҳидан қўл телефонларини тортиб олгани ва ҳозиргача қайтариб бермаётганини иддао қилди.

Ғўслик суҳбатдош вазиятнинг таранглашувига ҳокимият ичидаги кучларнинг атай президент Мирзиёевни ёмонотлиқ қилиш учун ҳаракати асосий сабаб бўлаётганини таъкидлади.

Самарқанд вилояти ИИБ бу ҳолатга қонуний баҳо берилишини билдирган. “Шу ўринда ўзбошимчалик билан, қонунда белгиланмаган тартибда бошқа бир фуқарони “самосуд” қилиш ёки шу каби ҳаракатларга уриниш жиноий жавобгарликни келтириб чиқаришини” эслатиб ўтган.

Eltuz.com