Собиқ ҳоким сайловни бойкот қилишга чақирди

Жорий йилнинг 7 август куни Ўзбекистон либерал демократик партияси Ўзбекистон президентлигига иқтидордаги давлат раҳбари Шавкат Мирзиёев номзодини илгари сурди.

«Элтуз» каналида ўз видеоблогини юритаётган Навоий вилояти Конимех тумани собиқ ҳокими, 70 ёшли қишлоқ хўжалиги мутахассиси Исмоил Оспанов эътиборини айни шу воқеага қаратди.

“Ниҳоятда кулгили масала. Либерализм нима эканини Мирзиёевнинг ўзи билармикин? Бирорта либерал қадам ташладимикин сиёсатда”, дея риторик саволлар қўяди Оспанов.

Ўзининг навбатдаги чиқишида у мухлисларини президент сайловида Шавкат Мирзиёевга овоз бермасликка ёки умуман сайловда қатнашмасликка чақирди.

“Мирзиёев яна беш йил ўтирадиган бўлса, (ўтирадиям албатта) бу тизим ўзгармайди. Сиз билан бизнинг қиладиган ишимиз, қўлдан келадиган иш – сайловга бормаслик. Бу сизнинг президентни мен сайламаганман, дейишингизга ахлоқий имконият беради”, деди Оспанов ўз видеочиқишида.

Eltuz.com