Компроматчиларга узоқ йиллик қамоқ жазолари сўралди

Кеча 19 cентябр куни Шайхонтоҳур тумани судида прокурор Human.uz сайти асосчиси ва раҳбари Хуршид Далиев ва “Ўзбекнефтгаз” ширкати матбуот котиби Сиёвуш Ҳошимовларни 15 йилга озодликдан маҳрум этиш ва 3 йилга журналистик фаолият билан шуғулланишни таъқиқлашни сўради.

Икковлон Ўзбекистон Республикаси ЖКнинг туҳмат, ҳақорат ва товламачилик моддалари билан судланмоқда. 

Давлат айбловчиси яна Human.uz, Sof.uz ва Terrabayt.uz таҳририяти балансидаги 5 та транспорт воситаси, 10 дан ортиқ камера ва компютер воситаларини мусодара қилишни сўради.

Давлат айбловчисига кўра, Human.uz сайти асосчиси ва раҳбари Хуршид Далиев ҳамда “Ўзбекнефтгаз” ширкати матбуот котиби Сиёвуш Ҳошимовларга базавий ҳисоблаш миқдорининг 600 баравари (198 миллион сўм) миқдорида жарима солиниши лозим.

Судланувчи Аҳмадилло Аҳмаджоновни давлат айбловчиси 5 йилга уй қамоғига ҳукм қилишни сўради.

Ўтган ҳафта прокурор Бандлик ва меҳнат муносабатлари вазирлигининг собиқ матбуот котиби, журналист Мавжуда Мирзаевага 3 йил давомида профессионал касбий фаолият билан шуғулланишни тақиқлаб, уни 6 йилга озодликдан маҳрум қилиш билан жазолашни сўраган эди.

Судланувчилар шу йилнинг 24 январида қамоққа олинган ва ДХХнинг «Гвардейский» номи билан танилган тергов изоляторида сақлаб келинмоқда.

Элтуз Ўзбекистонда блогер ва журналистларнинг қамалиши билан боғлиқ воқеалар тафсилотини ўрганишда давом этади, каналимизга обуна бўлишни, видеоларимизга изоҳ ёзишни унутманг.