Термизда уйи бузилганларга уч йилдан буён уй берилмаяпти

Термиз шаҳрида уйлари бузилиб, ўрнига янги кўп қаватли уйлардан янги уй ваъда қилинган 200 нафарга яқин фуқаро уч йилдан буён уйсиз қолмоқда. Уларга уй ваъда қилган қурилиш ширкати устидан эса жиноий иш очилган.
Элтузга етиб келган уларнинг мактубидан маълум бўлишича, улар уйлари бузилган 2021 йилнинг май июнь ойига қадар Термиз шаҳрининг “Шодлик” маҳалласидаги 45 та квартирада яшашган.
Улар яшаган уйлар бузилиб, ўрнида 9-12 қаватли уйлар қурилиши режаланган. Бу уйлар қуриб битгунига қадар қурувчи ширкат томонидан уйсиз қолган фуқароларга уй ижара қилиш учун товон пули тўлашга келишиб шартномалар тузилган.
“Бошланишида бир йиллик, иккинчи йили олти ойлик, кейин уч ойлик ижара пули бериб келинди. Мана охирги уч ойдан буён бир тийин ҳам ижара пули берилмасдан келинаяпти” дея ёзади уйсиз қолган термизликлар.
Уларнинг президент номига ёзган очиқ хатидан маълум бўлишича, уйни бир йилда қуриб бериш ваъда қилинган, бироқ турли бахоналар рўкач қилиниб бу ортга суриб келинган. 
“Бизга номаълум бўлган важ ва муаммолар билан қурувчи қамоққа олинганидан буён ижара пуллари тўланмай биз кўчада қолдик. Ҳозир сарсон-саргардонликда кўчама-кўча уйсиз хор бўлиб юрибмиз” дея билдирилади мактубда.
Мактубдан маълум бўлишича, бугунги кунда уларга на уй, на товон пули берилмаяпти. Улар орасида пения ёшидаги қариялар, ногиронлар, болали аёллар бор.
Элтуз уйдаги гапни кўчага олиб чиқади. Каналларимизга обуна бўлинг. Видеоларимизга лайк босинг.