Салимбой қамоқдан чиқди. «Офис»нинг «орқа кўча»си

Ўзбек жамоатчилиги орасида «Салимбой» номи билан машҳур Салим Абдувалиев бугун, 12 январь куни тушдан кейин қамоқдан озод этилган.

Унинг озодликка чиқиши собиқ мулозим Комил Алламжоновга суиқасд юзасидан Тошкентнинг Дархонидаги Отабек Умаровга тегишли қудратли «Офис»нинг фош бўлиши манзарасида юз бермоқда.

Олдинроқ Алламжоновга суиқасд юзасидан терговга тўсқинлик қилган Тошкент ИИББ бошлиғининг ўринбосари полковник Дониёр Ташходжаев қамоққа олинган эди.

Ташходжаев 2023 йил ноябрида бошланган ва расман “Долзарб 40 кунлик” тадбири номини олган оммавий ҳибсга олишларга раҳбарлик қилган.

Салим Абдувалиевнинг ҳибсга олиниши ҳақида ҳам матбуотга маълумотларни полковник Ташходжаев тақдим этган эди.

Айни пайтда Дониёр Ташходжаев Комил Алламжоновга суиқасд ташкилотчиларидан бири, ўтган йил ноябрида Жанубий Кореядан олиб келинган Жавлон Юнусовни ушбу рейдлар доирасида қамоқдан асраб қолгани ўртага чиққан.

Элтуз манбаларига кўра, кўчага қарши рейдлар «Офис» томонидан пухта ишланган режа бўлган.

Режадан мақсад жиноят оламининг кўзга кўринган авторитетларини Комил Алламжоновга қарши қайраш бўлган. Гўёки, бу рейдлар ортида Комил Алламжонов тургани қамалган “ўғрию тўғриларнинг ўзларига ҳам етказилган”.

Салимбойга яқин шахслардан бирининг Элтузга айтишича, “Бойнинг ўзи ҳам яқин яқингача унинг қамалиши ортида Алламжонов турганига ишонган”.

Айни мессеж Салимбой билан ҳар доим бир қаторда тилга олинадиган бошқа бир авторитет Ғофур Раҳимовга ҳам етказилган.

Салимбойнинг қамалиши фонида Ғофур Раҳимов Отабек Умаров билан Тошкентдаги спорт тадбирларида кўриниш берди.

Маълумки, 74 яшар Салим Абдувалиев ноқонуний ўқотар қурол сақлашда айбдор деб топилиб олти йилга озодликдан маҳрум этилган эди.

Унга қарши терговга бошчилик қилган Дониёр Ташходжаев эса Қирғизистондан контрабанда йўли билан қуролларни олиб кирган ва уларни ўтган йили 26 октябрда Алламжрновга қарши суиқасдда ишлатган гуруҳ раҳбари Жавлон Юнусовнинг жиноятларини яширишга уринганликда айбланмоқда.