2025 йилги “Front Line Defenders” мукофоти лауреатлари рўйхати эълон қилинди

Front Line Defenders ташкилоти 2025 йил учун “Хавф остидаги инсон ҳуқуқлари ҳимоячилари”га бериладиган нуфузли мукофот соҳибларини эълон қилди. Бу йилги беш нафар лауреат қаторида ўзбекистонлик инсон ҳуқуқлари ҳимоячиси, журналист ва жамоат фаоли Шарифа Мадраҳимова ҳам бор!

Шарифа Мадраҳимова — фарғоналик жасур ва фидоий ҳуқуқ ҳимоячиси бўлиб, қишлоқ жойларда фуқароларнинг ҳуқуқ ва манфаатларини ҳимоя қилиш, адолатсизликка қарши курашиш, мажбурий меҳнат ва болалар меҳнатига барҳам бериш соҳасида кўплаб ишларни амалга оширган. У ўзининг журналистлик фаолияти орқали кўплаб муаммоли масалаларни кўтариб чиққан ва ҳуқуқбузарлик ҳолатларини фош этган.

Ушбу мукофот бутун дунё бўйлаб турли минтақаларда хавф-хатарларга қарамасдан инсон ҳуқуқларини ҳимоя қилаётган шахсларга берилади. Бу йилги бошқа лауреатлар Бенин, Гаити/Доминикан Республикаси, Таиланд ва Ғарбий Саҳродан.

Front Line Defenders ижрочи директори Алан Глазго шундай деди:

“Бу беш нафар жасур инсон ва ташкилот инсон ҳуқуқларини ҳимоя қилиш йўлида улкан хавф-хатарлар остида иш олиб бормоқда. Улар – зулм, дискриминация ва қамоқда сақлаш каби вазиятларда умид нуридир.”

Гарчи Мадраҳимова тақдирлаш маросимида иштирок эта олмаган бўлсада, унинг номидан “Ўзбек форум” ташкилоти директори Умида Ниязовага сўз берилиб, унинг дил изҳорларини ўқиб эшиттирди. Мадраҳимова шундай деди:

“Мен бу мукофотни ўзим учун эмас, балки Ўзбекистондаги барча фидокор инсон ҳуқуқлари ҳимоячилари учун қабул қиляпман. Бу эътироф халқимиз овозини дунёга эшиттириш имконидир.”

Тақдирлаш маросими Ирландиянинг Дублин шаҳрида, шаҳар мэрияси биносида ўтказилди. Унда халқаро дипломатлар, ҳукумати вакиллари, фуқаролик жамияти аъзолари ва ОАВ ходимлари иштирок этди.

Front Line Defenders Award 2005 йилда таъсис этилган бўлиб, ҳар йили дунё бўйлаб инсон ҳуқуқларини ҳимоя қилиш йўлида катта хавф-хатарлар остида меҳнат қилаётган шахсларга берилади. Бу мукофот инсон ҳуқуқлари ҳимоячиларининг фаолиятига халқаро эътиборни қаратишга хизмат қилади.