«АҚЛЛИ ВАЗИР» БУЙРУҒИ ОҚИБАТИ 

2024 йил охирида Камбағалликни қисқартириш ва бандлик вазири Ботир Зоҳидовнинг ҳуқуқий асосдан холи буйруғи натижасида давлат бюджетига 2 миллиард сўмдан ортиқ зарар етказилди. Биргина қарор оқибатида ўнлаб фуқаролар ишсиз қолди, меҳнат ҳуқуқлари топталди ва суд қарорлари билан бу ҳолат “тугатиш эмас, камуфляж ўзгартириш” сифатида баҳоланди.

Олий Мажлис Сенати томонидан вазир Зоҳидов номига юборилган парламент сўровида меҳнат қонунчилигини бузиш ҳолатлари, уларнинг давлат ва фуқаролар манфаатига етказган зарари алоҳида таъкидланган. Сўровда ҳуқуқбузарликлар аниқ фактлар билан келтирилган — айниқса, суд қарорларига кўра меҳнат шартномаларининг асоссиз равишда бекор қилингани ва бунинг оқибатида юзага келган моддий ва ҳуқуқий талафотлар тилга олинган.

Ташқи меҳнат миграцияси агентлиги вазирлик буйруғига кўра тугатилган деб эълон қилинган, аммо амалда у бошқа бўйсунувда фаолиятини давом эттирмоқда. Жамоатчилик, ижтимоий тармоқлар ва ҳатто вазирлик мутасаддилари бу вазиятни “ишчи хуқуқларини бузиш” деб баҳолашди. Суд эса буни очиқ-ойдин ҳақсизлик деб топди — шу пайтгача 30 га яқин фуқаро суд орқали ишга тикланди.

Ишга тикланган фуқароларга тўланиши лозим бўлган маблағлар ҳанузча тўланмаган. Шу сабабли Мажбурий ижро бюроси томонидан Миграция агентлигининг барча ҳисоб рақамларига банд солинган. Яъни, нотўғри қабул қилинган бир қарор натижасида агентлик молиявий бўғинда қолди.

Парламент сўровида кўрсатилишича, прокуратура органлари 2024 йилнинг ўзида 1,1 миллиард сўмлик зарарни айбдор мансабдорлардан регресс тартибида ундириш тўғрисида қарорлар чиқарган. Агар бу амалиёт давом эттирилса, Зоҳидовнинг “тугатиш” операцияси ортидан келиб чиққан зарарлар ҳам мансабдорлар зиммасига юкланиши мумкин.

Камбағалликни қисқартириш вазифаси юклатилган вазир томонидан айнан иш ўринларини йўқ қилишга хизмат қилувчи қарор қабул қилиниши бугунги бошқарув тизимидаги муаммоларни очиқ-ойдин намоён этмоқда. Давлат манфаатига зарар етказиш, фуқаролар ҳуқуқини поймол этиш ва суд қарорларига қарши ҳаракат қилиш — бу ҳолатлар жавобгарликсиз қолмаслиги керак.