Наманганда «Экипаж такси»даги қариндош-уруғчилик ортидан текширув бошланди

Транспорт назорат инспекциясининг Наманган вилояти ҳудудий бўлими 1069 «Экипаж такси» агрегаторининг фаолияти қонунда белгиланган тартибга мувофиқлиги бўйича тегишли ташкилотлар билан ўрганиш бошланганини ва натижалар ҳақида яқин вақтда ахборот берилишини маълум қилди.

Ўрганиш Элтузда чоп этилган хабар ортидан бошланди. Нашрга мурожаат қилган, ўзини “Наманган тумани 1069 экипажи аъзоси” деб таништирган шахснинг айтишича, хизматда “таниш-билишчилик, қариндош-уруғчилик” авж олган, таксиларга уланган ҳайдовчиларга балл тизими жорий этилган ва унда “қариндошлар, ошна-оғайнилар” устунликка эга бўлмоқда.

Ҳайдовчилар 15 000 сўм ишга 12 000 сўм берилаётгани, эътироз қилганларга “ишласанг шу, бўлмаса ишлама” деган жавоб берилаётганини иддао қилган.

Транспорт назорат инспекцияси маълумотига кўра, ўрганиш натижалари оммага тақдим этилади.