Токиода беш нафар талончилик қилган ўзбек ушланди

Токио полицияси Токио шаҳрининг марказий туманларидан бири Шибуяда 2024 йил декабрь ойида содир этилган талончилик ва ҳужумда гумон қилинаётган 20 ёшлар атрофидаги беш нафар ўзбекистонлик эркакни қўлга олди.

Полиция маълумотига кўра, ушбу беш киши ўтган йилнинг 30 декабрь куни соат 5:30 ларда Шибуя туманидаги Марусияма-чо кўчасида уч нафар хорижлик эркак ва аёл билан атайин жанжал чиқариб, уларнинг ҳамёнлари ва сумкаларини талон-тарож қилган. Улар умумий 210,000 иена (тахминан 1,350 доллар) қийматидаги буюмларни ўғирлашган. Гумонланувчилардан бири жабрланувчи эркакни юзига тепиб, жароҳат етказгани айтилмоқда.

Полиция билдиришича, тўрт нафари Японияда ноқонуний равишда яшаб келаётган бу гуруҳ камида 10та ҳолатда Шибуя ва Шинжукудаги кўнгилочар ҳудудларда маст одамларнинг кредит карталарини ўғирлаб, улар орқали смартфонлар сотиб олиб, қайта сотиш орқали тахминан 8 миллион иена (тахминан 51,600 доллар) ишлаб топган бўлиши мумкин.

Гуруҳ етакчиси деб ҳисобланаётган 21 ёшли эркак ҳозирча адвокати билан учрашмагунча ҳеч нарса демаслигини айтган. Қолган тўрт гумонланувчи эса барча айбловларни рад этган, деди полиция.