Болгарияда 22 ёшли йигит сувга чўкиб ўлди

Болгариянинг Созополь шаҳрида дўстлари билан чўмилишга борган 22 ёшли ўзбек талаба сувда чўкиб ўлди.

Йигитнинг танаси баҳайбат қоятошлар орасига тиқилиб қолган ва уни чиқариб олишнинг имкони бўлмаяпти. Болгария қутқарув хизмати ходимлари айни пайтда чўкиб кетган кишини сувдан чиқариб олишнинг иложи йўқлигини билдирган.

Ўзбекистон Ташқи ишлар вазирлиги матбуот котиби Аҳрор Бурҳонов ҳам ҳолат юзасидан муносабат билдирди.

“Мамлакатимиз фуқаросининг Болгариянинг Созополь шаҳрида вафот этганлиги ҳақидаги хабарни чуқур қайғу билан қабул қилдик. Марҳумнинг оила аъзоларига чуқур ҳамдардлигимизни билдирамиз”, дейди у.

Қайд этилишича, ушбу маълумот келиб тушиши билан, Болгария Республикасини қамраб олувчи Ўзбекистоннинг Истанбулдаги Бош консулхонаси билан дарҳол алоқа ўрнатилган.

 Ҳозирда дипломатлар марҳумнинг яқинлари ҳамда Болгариянинг тегишли давлат идоралари вакиллари билан ҳамкорликда ишламоқда. Вазият юзасидан барча зарур чора-тадбирлар кўрилмоқда.