Боғотда кумир мафияси ўзини кўрсатди

Хоразм вилояти Боғот туманида халқ қиш совуғидан кўра туман кўмир омборини назорат қилувчи гуруҳнинг совуққонлигига чидамайди. 2025 йил 4 октябрь куни тумандаги омборга келган тўртта вагондан бири очиқчасига, халқ кўзи олдида хусусий юк машинасига юклаб, “Янгиариқ тумани учун” деган баҳона билан олиб кетилди. Қолган кўмир эса Ҳазорасп ва Хонқа туманларига, хусусий шахсларга бозор нархида сотилди. Аммо боғотликлар учун мўлжалланган кўмир бир грамм ҳам қолмади.

70 тонна кўмир 70 оилани қишдан олиб чиқиши мумкин эди. Лекин бу кўмир мутлақо бошқа томонга бурилди. Туманда ўзини кўмирнинг эгасидек тутаётганлар бор. Улардан бири бу йилнинг бошида ўғирлик билан қўлга тушган, судланган. Аммо шундай шахслар яна омборга қайтарилди ва барча назорат яна ўша қўлларга топширилди. 

Омборга келган 30 га яқин вагоннинг фақат 10-15 таси халққа берилди. Қолгани хусусий омборларга киритилди ва 1000 сўмлик кўмир 1400 сўмга сотила бошланди. 

Тумандаги омбор 10 йилдан зиёд вақтдан бери С.Қ., Ш.Қ. ва С.Қ. деган таниш исмлар билан боғлиқ. Улар кўмирни ҳеч қандай қонуний асоссиз назорат қилиб келмоқда. Электрон навбат, MyGov орқали олинган рухсатнома, ҳеч бири ёрдам бермаяпти. Омбор олдида 30 минг сўмга юклатиш “услуги”, 100 минг сўм берсанг “яхшилаб юклаб берамиз” деган очиқ талаб.

Юклаш вақтида эса энг йирик, сифати яхши кўмирлар махсус 20 тоннали машинага ажратилиб, яна ўша хусусий омборга кетади. Яқинда тайинланган янги раҳбар эса қўғирчоқ. Қарор қабул қила олмайди, собиқ раҳбарлардан қўрқади. 

Омборга фақат тўртта хусусий Isuzu автомашинаси навбатсиз кира олади. Уларнинг бири омбор раҳбариники, бири ўзиники, қолган иккиси “дўстлариники”. 

Энг хунук ҳолат – паспортга бир тоннадан ортиқ кўмир олсангиз, икки баробар ҳақ тўлашингиз шарт. Ҳам очиқ талаш, ҳам қора бозор, ҳам кўр-кўрона бошқарув.

Халқ бунақа омборга эмас, бунақа мафияга қарши. Агар О‘zbekko‘mir АЖ раҳбарияти ва тегишли идоралар шошилмасдан ҳаракат қилса, халқ ўз чорасини кўради.