Қашшоқлар фаровонлиги ёки калтак шукронаси

«Ижтимоий фикр» барака топсин, яна раҳбарга ёқадиган, ақлини таниганларнинг истеҳзосига сабаб бўладиган навбатдаги сўрови натижасини эълон қилди.

Унга ишонадиган бўлсак, сўров иштирокчиларининг 90,2 фоизи президентнинг сиёсати аҳолининг орзу-умидларини тўла рўёбга чиқараётганини билдирган.

Давлат раҳбари саъй-ҳаракатлари натижасида иқтисодиёт, ижтимоий соҳа, тиббиёт, илм-фан ва таълим, ахборот-коммуникация технологиялари, саноат, суд-ҳуқуқ тизими, фермерлик ва тадбиркорликни модернизация қилиш, инвестициялар жалб қилиш бўйича эришилган натижалар юртдошларимиз ишончини мустаҳкамлаётгани айтилган.

Олинган натижаларга кўра, юртдошларимизнинг аксарияти Ш.Мирзиёев Ўзбекистон фуқаролари орзу-умидларини тўла рўёбга чиқараётганига ва аҳолининг мутлақ қўллаб-қувватлашига эга раҳбар эканига қатъий ишонади.

Мониторинг президентга ишонч даражаси 2017 йил июль ойидаги 92,4 фоиздан жорий йилнинг октябрь ойида 93,1 фоизга ошганини кўрсатган.

Бу рақамларни марҳум президент Ислом Каримов даврида худди шу мавзуда «Ижтимоий фикр» томонидан ўтказилган сўров натижалари билан солиштирамиз.

Сал фарқ бор. Рақамлар нисбатан кичик, аммо залвори ерни ёради. Худди Ш.Мирзиёевнинг бугунги ижтимоий, иқтисодий аҳволимиз ҳолатини танқид қилганига ҳамоҳанг.

Агар танқид қилмаганида, назаримизда, Каримов давридаги кўрсаткичлардан ортиқ бўларди, асло кам эмас.

Шунчалик ҳамоҳангки, Каримов давридаги рақамларни такрорлай олмаслик даражасида. Камтарликнинг ўзбек юртбошилари даражасидаги кўрсаткичи.

Ҳолбуки, Ўзбекистонда аҳолининг 6,3 фоизи ёки 1,9 миллион киши тўйиб овқатланмайди. Бу БМТ Озиқ-овқат ва қишлоқ хўжалиги ташкилотининг 2016 йил якунлари бўйича эълон қилган ҳисоботида келтирилган рақамлар.

Ўтган бир йилда бундан яхшироқ бўлиб қолганини исботловчи далиллар йўқ. Расмий статистика идорасининг нархлар ошгани ҳақидаги маълумотларига, аҳолининг реал даромадлари кўпайгани ҳақидаги маълумотлар йўқлигига асослансак, аҳвол яхшиланмагани ҳақиқатга яқинроқ.

Буюк Британиянинг The Legatum Institute таҳлилий маркази эълон қилган «Фаровонлик 2017» индексида эса Ўзбекистон умуман йўқ.

Шундай «фаровон», президенти ўз фуқаролари «орзу-умидларини тўла рўёбга чиқараётган» мамлакатнинг бу индексга кирмай қолганининг ўзи ғалати.

Расмий ОАВ «ўзбек халқининг фаровонлиги, турмуш даражаси юксалиб бораётгани»ни оғиз кўпиртириб айтаётган, қолаверса, аҳолисининг «орзу-умидлари тўла рўёбга чиқарилаётган» мамлакат қолиб, бу рейтинг бошида қандайдир Норвегия, Янги Зеландия ва Финляндия каби мамлакатлар ўралашиб юргани ғалатидек туюлади.

Энг қизиғи, «Ижтимоий фикр» «фаровонликда яшаётган» бу халқнинг ўзидан ҳақиқатан ҳам шундай умргузаронлик қилаётгани ҳақида сўраб кўрганмикин?!

Элтуз