«Ютуб»ни ер ютди, «фейсбук»ка қозиқ қоқилди

Ўзбекистонда баъзан «ютуб», баъзан «фейсбук» каналлари узилишидан шикоятлар ортмоқда.

15 ноябрь куни «Элтуз» нашри Downdetector сайти орқали «ютуб» каналидаги узилишлар эпицентри Тошкент, Андижон, Нукус шаҳарларига тўғри келганини, «фейсбук» эса кўпроқ Тошкентда тўсилаётганини кузатди.

ЎзА мухбири Инобат Аҳатова 13 ноябрь куни «Youtubeни ер ютдими?» деган мақоласида “Ўзбектелеком” вакили Бобур Абдуллаевдан иқтибос келтириб, Youtubeнинг ишламаслигига компания айбдор эмаслигини билдирган эди.

Бундан илгари Ўзбекистондаги интернет монополисти бўлган “Ўзбектелеком” раҳбарлари «фейсбук»даги қусурни ҳам шу тариқа ўзларидан соқит қилишган эди.

Қизиғи, «Youtubeни ер ютдими?» сарлавҳаси остидаги мақоланинг ўзи ҳам 15 ноябрга келиб «ер ютган» каби расмий сайт саҳифасидан ғойиб бўлди.

Шу йилнинг майида эса Ўзбекистонда оммавий саналган «Телеграм» мессенжери узоқ вақт ишламай қолгач, юзерлар кўплаб маълумотларини йўқотишган эди.

Рассом Туз
Eltuz.com