Мирзиёев ташрифига Парижда Рустам Иноятов ниқобини кийиб чиқишди

Франция пойтахти Парижда 9 октябрда президент Мирзиёевнинг расмий ташрифига бағишланган норозилик акцияси иштирокчилари турли шиорлар билан бирга МХХ собиқ раиси Рустам Иноятов ниқобини кийиб чиқишди.

«Президент Мирзиёев бу шахсни ишдан кетказганида кўпчилик жудаям хурсанд бўлган, жумладан, халқаро ҳамжамият ҳам олқишлаган эди. Биз Иноятовнинг жиноятлари келгусида очилиб боради, деган ниятда эдик. Лекин охирги воқеалар бунинг жудаям аксини кўрсатяпти. Жудаям салбий воқеалар гувоҳи бўляпмиз», деди Швециядан тадбирга етиб келган ўзбек фаоли Дилобар Эркинзода ижтимоий тармоқда қилган жонли ёйинида.

2018 йилнинг январида президент Мирзиёев танқидидан сўнг Рустам Иноятов Ўзбекистон Миллий хавфсизлик хизмати (МХХ) раислигидан олинган эди.

27 август куни эса президент фармони билан МХХнинг собиқ раиси Иноятов ислоҳотларнинг бориши ва ҳуқуқ-тартибот фаолиятини мувофиқлаштириш масалалари бўйича президент маслаҳатчиси этиб тайинланди.

Рустам Иноятовдан ташқари, акция иштирокчилари Россия мафиясига алоқадор кўрилган Салим Абдувалиев, Алишер Усмоновнинг ҳам ниқобларини кийиб олишган.

Акция ташкилотчиси Марказий Осиёда инсон ҳуқуқлари ассоциацияси раҳбари Надежда Отаевага кўра, намойишчилар Ўзбекистондаги сиёсий маҳкумларни озод қилиш, сўз эркинлиги ва демократик ислоҳотлар ўтказишни талаб қилишмоқда.

Айни пайтда Парижнинг Елисей саройида сўнгги 22 йил давомида илк бор Ўзбекистон ва Франция президентларининг учрашуви бўлиб ўтмоқда.

eltuz.com