Тошкент бозорларини чирмовуқдек эгаллаган порахўр ким?

Тошкент деҳқон бозорларидаги коррупцион жиноятларни гувоҳлар тасдиқламоқда.

Тошкент шаҳрида жами 20 та бозор мавжуд. Бозорлар шаҳар ҳокимлиги тасарруфидаги Муниципал активларни бошқариш марказига бўйсунади. Марказ раҳбари Аҳад Раззоқов, муовинлар эса раҳбарнинг амакиваччалари. Бирининг исми Камолиддин, яна бирови Отабек (лақаби Отабек нос).

Бозор масъулларининг таъкидлашича, Аҳад Раззоқов бозор раҳбарлари билан мулоқот қилмайди. Иддаоларга кўра, бозорлардан кунлик ўлпон солиқ йиғишга Отабек нос жавобгар. Бозордан йиғилган кунлик “солиқ”ни Отабек нос кечки пайт автотураргоҳларда олади. Бозор раҳбарларини ишдан олиш, янги раҳбар тайинлаш, кунлик солиқ ҳажмини белгилаш – буларнинг барчаси Отабекнинг вазифаси.

Муниципал активларни бошқариш маркази ходимларидан Тўлқин Иброхимов ва Шоҳруҳ деган шахслар бозорларни кузатади, кунлик тушумни ўрганиб, Отабек носга далолат қилади. Отабек эса тушумдан бир қисмини бюджетга топшириб, қолганини ўзига олиб қолади, дейди тизим вакиллари.

Бозорлардаги барча автотураргоҳларнинг раҳбари Тимур ҳам раҳбар Аҳад Раззоқовнинг қайниси. Раззоқовнинг яна бир қариндоши Ўктам Янгиобод ихтисослашган бозорини бошқаради. Отчопар буюм бозорида эса Раззоқовнинг вакили Шухрат тожик исмли шахс экани маълум қилинди.

“Отабек носнинг вакиллари ҳар бир бозорда бўлиб “касса”ни назорат қилишади. Масалан, битта катта бозорда 1000та савдогар бор, шулардан патта пули йиғилади. Лекин кассага ярми кирим қилинади. Кирим қилинмаётган пуллар эса маҳсулот нарх-навоси устига минади. Қимматчилик сабабларидан бири ҳам шунда. Бу каби фитналар жуда кўп”, дейди савдогарлардан бири.

Элтузга етиб келган маълумотларга кўра, Эски жува бозорида “гўшт қироли” сифатида танилган Анвар Муҳаммедов асли 20 йилдан бери фаррош лавозимида расмийлаштирилган. Амалда эса Гумбазни бошқаради. “Чўчқа” ва “жугут” лақаби билан танилган Анвар Муҳаммедов аввал бозорқўмга пора берган бўлса, энди бозор тушумини Отабек нос билан бўлишади.

Элтузга маълум фактларни Бош прокуратура, ДХХ каби органлар билмаслиги мумкинмас. Аҳад Раззоқов оиласи пойтахт бозорларини чирмовуқдек эгаллагани аниқ. Бу коррупцион фаолиятга чек қўйиладими? Нега бозор тушумлари, бозор фаолияти шаффоф эмас – булар ҳануз очиқ савол бўлиб қолмоқда.