Баҳодир Файзи: АҚШдаги сайловлар натижаси ўзбекларга ҳам боғлиқ

5 ноябрь куни америкаликлар президентлик сайловида овоз беради.

Номзодлар Республикачи собиқ президент Доналд Трамп ва Демократик партиядан номзод, вице-президент Камала Ҳаррис.

Сайловлар Украинадаги уруш, Яқин Шарқ инқирози ва Хитойнинг ортиб бораётган таъсири манзарасида ўтяпти.

Президентликка номзодларнинг Украинани қўллаб-қувватлаш борасида қарашлари фарқли.

Трамп президент этиб сайланса, урушни 24 соат ичида тўхтатишини даъво қилган. Лекин, ниманинг эвазига тўхтатишини айтмаган.

Ҳаррис эса Украинани охиригача ҳимоя қилишини билдирган.

Ҳозирги сўров натижаларига қаралса, қарорсиз штатларда ҳар икки номзод тенг бораётганини кўрамиз.

Лекин, сўровлар номзоднинг ғолиб бўлишини аниқлашга ёрдам берадиган кўрсаткич эмас.

Улар сайловнинг якуний натижасини аниқ башорат қилиб беролмайди.

Масалан, 2016 йилда жамоатчилик фикри Ҳиллари Клинтон пешқадам эканини кўрсатган, лекин Клинтон сайловни ютқазган. Трамп ғолиб бўлган.

Бунинг сабаби – АҚШда сайловчилар коллегиясининг овозлари ҳисобга олинади ва бу овозлар оддий сайловчилар кайфиятини акс эттирмайди.

Бундан ташқари, АҚШда қайси партияга овоз бериши олдиндан маълум бўлган штатлар бор. Булар қарорли штатлар.

Қарорсиз штатлар овози доим ўзгариб туради. Президентлик учун кураш айнан шундай штатларда кечади.

Шундай штатлардан бири Пенсилвания штати.

Бу штатда берилган бир-икки овоз ҳам керак бўлса у ёки бу номзод тақдирини ҳал қилиши мумкин.

Пенсилвания штатининг Питтсбург шаҳрида яшовчи сиёсий таҳлилчи Баҳодир Файзи буни бизга батафсил тушунтириб беради.