Наманганда телефонни қутқараман деб, уч киши хожатхонада ўлди

Мобил телефонини ҳожатхона чуқурига тушириб юборган наманганлик аёл ёллаган икки ишчи ва уларни қутқармоқчи бўлган врач ҳалок бўлди.

Samsung-Galaxi русумидаги бу телефонни аёлга олиб бериш учун, нарвон билан ҳожатхона чуқурига тушган одамлар ахлат гази ҳидидан ҳушидан кетишган.

Кейин аёл доктор чақирган, бироқ уларни қутқармоқчи бўлган шифокор ҳам чуқурга тушгач хушидан кетган.

Икки ишчи воқеа жойида, врач эса шифохонада вафот этди.

13 июл куни Наманган вилоятида юз берган бу воқеа ҳақида Фавқулодда вазиятлар бошқармаси (ФВВ) матбуот хизматидан иқтибос келтириб кўплаб сайтлар хабар берди.

Намангандаги ФВВ вакили, жумладан, ахлат газининг жуда заҳарли экани, олий маълумотли врач чуқурга тушиш ўрнига шу заҳоти тегишли идораларга хабар бериши кераклигини айтган.

Бу ҳақда илк хабарни «Спутник» нашрига берган Дилшода Раҳматова: «Уч кишининг бир матоҳ туфайли нобуд бўлганини энг аҳмоқона ўлимлар рўйхатига киритиш мумкин» дейди.

«Бу одамларнинг сичқончалик фаҳми йўқ!» дейди манзарани аччиқ сарказм билан акс эттирган рассом Туз.

Рассом Туз
Eltuz.com