Бухоро собиқ ҳокимининг қамалган ўғли замҳоким бўлди

Салом қадрли муҳлислар, бугун 12 сентябр Элтуз ўзининг кундалик кўрсатувларини давом эттиради.

Бухоро вилояти собиқ ҳокимининг уюшган жиноий гуруҳ тузиш, ўғрилик ва давлат мулкини талон-торож қилиш каби жиноятларда айбланиб 14 йилга қамалган ўғли Шарофиддин Ҳусенов Бухоро шаҳар ҳокимнинг инвестициялар ва ташқи савдо масалалари бўйича ўринбосари лавозимига тайинланди.

Шарофиддин Ҳусенов 2011 йилда укаси Садриддин Ҳусенов, амакиси, дўстлари билан биргаликда Бухорода ўта оғир жиноятлар содир этгани учун 14 йилга озодликдан маҳрум этилган эди.

Ўшанда Ўзбекистон тарихида илк бор 16 йилдан буён вилоят ҳокими лавозимида ишлаб турган ҳокимнинг ўғиллари устидан суд шу вилоятнинг ўзида бўлиб ўтган ва маҳаллий телеканаллар бу суд жараёнини батафсил ёритган эди.

Вақт ўтиб, президент Каримов вафотидан сўнг, Самойиддин Ҳусенов оқланди. Жорий ва ўтган президентлик сайловларида  ишончли вакил сифатида ҳам қатнашди.

Нақд 270 томлик жиноятлари билан довруғи Ўзбекистонга ёйилган Самойиддин Ҳусенов яқинлари ҳам секин аста қамоқдан чиқа бошлади.

Мана, ўша машҳур жиноят ишининг асосий фигуранти Шарофиддин Ҳусенов шаҳар ҳокимига ўринбосар бўлди.

Бу ҳақда Элтузга хабар берган маҳаллий ҳокимият вакили ўз ишини бу ерда давом эттириш истаги қолмаганини айтди.

«Биз туну кун мажлисларда қатнашиб, маҳаллалар кезиб, раҳбарлардан сўкиш эшитиб, ишлаб юрамиз. Аммо қаердандир собиқ ўғрилар амалга келишади, биз яна чеккада қоламиз,” дея ёзди ҳокимият вакили.

Яна бир манбанинг тахмин қилишича, Шарофиддин Ҳусенов  Жамол Носиров ўрнига Бухоро шаҳар ҳокими лавозимига тайёргарлик учун юборилган бўлиши ҳам мумкин.

Элтуз мамлакатда кечаётган кадрлар алмашинуви, коррупция ва непотизм кўринишларини ёритишда давом этади. Кўрсатувларимизни кузатиб боринг, каналимизга обуна бўлинг.

ОтветитьПереслать