Беморлар: Қашқадарёдаги болалар шифохонасидаги овқатлар сифатсиз

Элтузга Қашқадарё вилоят болалар кўп тармоқли тиббиёт бирлашмасида озиқ овқат сифатининг ёмонлиги юзасидан кўплаб шикоятлар келиб тушди.

Шикоятлар аксарият вилоятнинг деярли барча туманларидан оғир холатларда келтирилган ёш болалари билан ётган ота оналардан келган.

Уларнинг ёзишича, ушбу даволаниш муассасасида давлат томонидан даволанувчиларга бепул бериладиган овқатнинг таркиби ва сифати жуда ёмон.

Ҳусусан боласи билан бирга даволанаётган аёлнинг ёзишича, улар берган бўтқа ва гречка шўрвадан фақат сувнинг таъми келади. Ҳатто туз солинмаган.

Бошқа бир аёл эса, касалхона овқатини ейишдан воз кечгани, уйидагилардан овқат буюртираётгани ҳақида ёзган. Лекин узоқ туманлардан келиб даволанаётганларда бундай шароит йўқ, дея ёзади у.

Урология бўлимида ўғли билан ётган аёл ҳам яқинлари узоқда яшаши боис ҳар куни ҳам уйидан овқат олдириш имкони йўқлиги, баъзан ейишга яроқсиз овқатни емасдан оч қолаётганини айтади.

“Тухум беришади қорайиб кетган. Ҳар куни таъмсиз бир хил карам шўрва ва оғизга олиб бўлмайдиган бўтқа” дея таърифлайди бемор боланинг онаси касалхонадаги овқатлар сифатини.

Маълум бўлишича, мазкур шифохонага Самарқанд вилоят Жомбой туманидаги «ЖОМБОЙ ПАРХЕЗ ТАОМ» МЧЖ хизмат кўрсатади.

Шу ошхонада ишловчи Элтуз манбасига кўра мазкур тиббиёт бирлашмаси бош шифокори ушбу ширкат билан келишиб молиявий таъминотни талон тарож килиб келмоқда, натижада болалар ва оналарга оддий сувда қайнатилган каша ва фақат қуруқ карамдан пиширилган шўрва берилмоқда.

Ҳатто ошхона ходимлари ҳам беморларга ушбу таомни беришга уялишини айтишмоқда. Элтузга жўнатилган суратларда касалларга берилаётга овқат сифати акс этган.

Элтуз бу мурожаатлар юзасидан тегишли мутасаддилар, Қашқадарёдаги тиббиёт бирлашмаси ва Жомбой пархез таом МЧЖ рахбарларининг жавобини кутади.