Мактаб директорлари банкка нақд пул қўйишга мажбурланяпти

Фарғона вилоятининг Учкўприк туманида Ўзбекистон мустақиллигининг 25 йиллиги муносабати билан пенсионерларга пенсия пулларини бериш учун мактаб директорларига “Агробанк»ка 100 минг сўмдан омонат маблағи қўйиш талаб этилмоқда.

• Туман халқ таълими бўлими мудири дастлаб бизга “Агробанк»ка бориб, кекса, боқувчисини йўқотган, ногиронларни туман ҳокими номидан табриклаш учун 100 минг сўмдан пластик картадан бўлса ҳам пул тўлаб келишга буйруқ берди, – деди мактаб директорларидан бири. – Банкка келсак, у ердагилар туманда нақд пул йўқлиги сабабли пенсионерларга пенсия пулларини вақтида бериш мақсадида туман ҳокими шундай қарор чиқарганини айтишди. Фақат қандайдир ҳисоб рақамига пластик орқали эмас, балки 100 минг сўм нақд тўлаётган одам ўз номига омонат маблағи очар экан. Пенсионерлар пенсия пулини олиб бўлгач, омонатларимиз қайтариб берилар экан. Мактаб раҳбари бўлсак-да, бизда ҳам нақд пул йўқ. Пластигимиздаги маблағларни ҳозирги кунда баъзи “ишбилармон”, “ҳожатбарор” лар 18 фоиз устама эвазига нақдлаштириб бермоқда.

«Элтуз» мухбири банк ходими билан гаплашганида у бу ҳақдаги маълумотни тасдиқлади. Бу ҳолат қачонгача давом этади, деган саволга ходим елка қисишдан нарига ўта олмади.

«Элтуз» мухбири бу ҳолат вилоятнинг барча туманларига тааллуқлими ёки фақат Учкўприк туманида кузатиляптими, деган саволга жавоб топиш учун “Агробанк»нинг вилоятдаги филиаллари билан боғланишга ҳаракат қилди. Аммо банкнинг на вилоят филиали, на Олтиариқ ва Қўқон филиалларидаги телефонларга қилинган қўнғироқларга ҳеч ким жавоб бермади.

Насима Даврон қизи

Eltuz.com