Cўконғич раҳбарлар сафидаги Миришкор тумани ҳокими

Йиғилишда Қашқадарёнинг Миришкор тумани ҳокими Бахтиёр Ражабовнинг ўз қўл остидагиларни ва йиғилиш иштирокчиларини уят сўзлар билан ҳақорат қилгани ва ургани аудиоси 2 март куни ижтимоий медиа орқали тарқалди.

Тармоқ орқали “Элтуз”га етиб келган аудиода туман ҳокимининг икки ярим минут давомида куракда турмайдиган сўзларни муттасил айтиб сўкаётгани, ураётганини эшитиш мумкин.

Мирзиёев иқтидорга келган сўнгги уч йил ичида ҳокимларнинг ўз қўли остидагиларни ҳақоратлаши ва калтаклаши Ўзбекистонда доимий кузатилаётган ҳолатга айланди.

Бундан аввал мактаб ўқитувчиларини “ҳайвон”, “шоқол”, “эшшак”, “гадой” деб сўккан Андижон шаҳри ҳокими Дилмурод Раҳматуллаев тармоқда “машҳур” бўлган эди.

Шунингдек, “Элтуз” 2019 йилнинг январида Олот тумани ҳокими Шерали Саломовнинг фермер Дўстматовни калтаклагани ва “жамоат эҳтиёжлари” учун 25 миллион сўм маблағ ўтказиб беришга мажбурлагани ҳақида хабар берган эди.

2016 йилнинг октябрида эса фермерлар кўзи ўнгида пахтани оз тергани учун маънавият дарси ўқитувчисини калтаклаган ва уят сўзлар билан ҳақоратлаган Қашқадарёнинг Нишон тумани ҳокими Асрор Жўраев ҳақида гап-сўзлар урчиганди.

Эслатиб ўтамиз, туман ҳокимлари ҳақоратлари янграётган Қашқадарё вилоятига яқин ўтмишда айни хулқи, аниқроғи, фермерларни сувга бўктириб сазойи қилгани учун тармоқда машҳур бўлган бош вазирнинг собиқ ўринбосари Зойир Мирзаев ҳоким этиб тайинланган.

Eltuz.com