Co‘kong‘ich rahbarlar safidagi Mirishkor tumani hokimi

Yig‘ilishda Qashqadaryoning Mirishkor tumani hokimi Baxtiyor Rajabovning o‘z qo‘l ostidagilarni va yig‘ilish ishtirokchilarini uyat so‘zlar bilan haqorat qilgani va urgani audiosi 2 mart kuni ijtimoiy media orqali tarqaldi.

Tarmoq orqali “Eltuz”ga yetib kelgan audioda tuman hokimining ikki yarim minut davomida kurakda turmaydigan so‘zlarni muttasil aytib so‘kayotgani, urayotganini eshitish mumkin.

Mirziyoev iqtidorga kelgan so‘nggi uch yil ichida hokimlarning o‘z qo‘li ostidagilarni haqoratlashi va kaltaklashi O‘zbekistonda doimiy kuzatilayotgan holatga aylandi.

Bundan avval maktab o‘qituvchilarini “hayvon”, “shoqol”, “eshshak”, “gadoy” deb so‘kkan Andijon shahri hokimi Dilmurod Rahmatullaev tarmoqda “mashhur” bo‘lgan edi.

Shuningdek, “Eltuz” 2019 yilning yanvarida Olot tumani hokimi Sherali Salomovning fermer Do‘stmatovni kaltaklagani va “jamoat ehtiyojlari” uchun 25 million so‘m mablag‘ o‘tkazib berishga majburlagani haqida xabar bergan edi.

2016 yilning oktyabrida esa fermerlar ko‘zi o‘ngida paxtani oz tergani uchun ma'naviyat darsi o‘qituvchisini kaltaklagan va uyat so‘zlar bilan haqoratlagan Qashqadaryoning Nishon tumani hokimi Asror Jo‘raev haqida gap-so‘zlar urchigandi.

Eslatib o‘tamiz, tuman hokimlari haqoratlari yangrayotgan Qashqadaryo viloyatiga yaqin o‘tmishda ayni xulqi, aniqrog‘i, fermerlarni suvga bo‘ktirib sazoyi qilgani uchun tarmoqda mashhur bo‘lgan bosh vazirning sobiq o‘rinbosari Zoyir Mirzaev hokim etib tayinlangan.

Eltuz.com