Ўзбекистон энди ЕОИИда кузатувчи. Ассалом, Совет Иттифоқи

11 декабрь куни Евроосиё иқтисодий иттифоқининг онлайн саммитида Ўзбекистон ва Кубага ташкилот ҳузуридаги кузатувчи давлат мақоми берилди.

Тадбирда ЕОИИга аъзо давлатлар – Россия, Беларусь, Қозоғистон, Қирғизистон, Арманистон, шунингдек, кузатувчи мақомидаги Молдова ва таклиф этилган мамлакат сифатида Куба етакчилари иштирок этди.

Ўзбекистон президенти Шавкат Мирзиёев Беларусь президенти, Олий Евроосиё иқтисодий кенгаши раиси Александр Лукашенконинг таклифига биноан Евроосиё иқтисодий иттифоқи (ЕОИИ)нинг видеоанжуман шаклидаги саммитида иштирок этди.

Президент Шавкат Мирзиёев ўз нутқида Ўзбекистоннинг кузатувчи мақомини олиш тўғрисидаги мурожаати қўллаб-қувватлангани учун миннатдорлик билдирди.

Жорий йил май ойида Олий Мажлис Ўзбекистоннинг Евроосиё иқтисодий иттифоқида кузатувчи давлат мақомида иштирок этиши тўғрисидаги таклифни маъқуллаган эди.

Smartgov Consulting бюроси ижрочи директори Азиза Умарова эса ЕОИИ Россиядан бошқа аъзо давлатларга ҳеч қандай яхшилик олиб келмагани, жумладан, Қозоғистон ва Беларусь иқтисоди «ҳар доимгидан ҳам аянчли аҳволда» эканини айтган.

Унинг фэйсбукда ёзишича, Россия етакчилигидаги иттифоққа киргандан кейин «орқага йўл йўқ».

«Ҳеч қанақасига. Тинчгина ажралиш, тинч йўл билан тарқалиш имконсиз. Барча қарорлар бир мамлакат томонидан қабул қилинади ва бу бизнинг мамлакат бўлмайди. Иттифоққа кириш бир томонга чипта сотиб олишдир. Ассалом, Совет Иттифоқи. Бу менинг тенгдошларим энг кам умид қилган воқеа эди», деб ёзди Азиза Умарова.

Eltuz.com