Путин Украинадаги ҳокимиятнинг ноқонунийлигини иддао қилди

Путин кеча Мурманскдаги «Архангельск» атом сув ости кемаси денгизчилари билан учрашиб Украинадаги ҳокимиятнинг нолегитимлиги ҳақида писанда қилди. Зеленскийнинг президентлик муддати тугаганига ишора қилиб,  Украинадаги ҳокимиятни ноқонуний деб атади.

«Агар эртага бошқа рахбар келадиган бўлса» ким билан келишув битими имзоланиши тушунарсиз деди у.

Агар гап Украинадаги ҳокимиятнинг доимий алмашинуви ҳақида кетаётган бўлса, чиндан ҳам Путин давлат тепасига келган 2000 йилдан буён ўтган 25 йил ичида Украинада бешта президент алмашди. Кўринадики нолегитим рахбар сифатида бу чорак аср давомида фақат Путин ҳокимиятда қолмоқда. Россиянинг муттасил агрессияси боис ўн йиллик уруш давомида ҳам бир неча бор Украинада демократик сайловлар амалга ошди. Бироқ урушнинг актив фазаси кечаётган, Украина оккупация қилинаётган сўнгги даврда бундай сайлов ўтказилиши мумкин эмас. Аммо афтидан Путин бу ҳақда эмас, Украинани янчиб йўқ қилиш ҳақида кўпроқ ўйлаяпти. 

«Мен аввал ҳам уларни эзиб ташлашимизни, йўқ қилишимизни айтгандим» дея алжирашда давом этди Путин. Бироқ у бу иш қўлидан келмаслигини ҳам писанда қилди.

У ўзининг ғарб ҳамкорлари аталмиш ошналарига ишониб хато қилишни истамаслиги ҳақида гапириб, Европа ҳамиша унинг «бурнидан тортиб етаклашга» уринаётганидан нолинди. Бироқ, албатта Европа билан бирга ишлашга тайёрлигини таъкидлади. 

Кремль рахбари иддаоларига Расмий Киевнинг жавоби кўп куттирмади.

Ҳусусан Украина президенти маслаҳатчиси Дмитрий Литвин Россия етакчисига аввало зудлик билан даволаниши лозимлигини тавсия қилди. 

«Агар Путин ушбу урушни тўхтатиш йўлида жиддий ҳаракат қилиб, ким билан ҳамкорлик қилиши кераклигини тушунишга интилаётган бўлса. У ҳолда мия фаолиятини амалга ошириш учун шунчаки бир нечта таблетка истеъмол қилиши кифоя— фақат агар унга эндиликда дори кор қилган тақдирда» дея писанда қилди Украина президенти маслаҳатчиси Литвин.