Putin Ukrainadagi hokimiyatning noqonuniyligini iddao qildi

Putin kecha Murmanskdagi «Arxangelsk» atom suv osti kemasi dengizchilari bilan uchrashib Ukrainadagi hokimiyatning nolegitimligi haqida pisanda qildi. Zelenskiyning prezidentlik muddati tugaganiga ishora qilib,  Ukrainadagi hokimiyatni noqonuniy deb atadi.

«Agar ertaga boshqa raxbar keladigan bo‘lsa» kim bilan kelishuv bitimi imzolanishi tushunarsiz dedi u.

Agar gap Ukrainadagi hokimiyatning doimiy almashinuvi haqida ketayotgan bo‘lsa, chindan ham Putin davlat tepasiga kelgan 2000 yildan buyon o‘tgan 25 yil ichida Ukrainada beshta prezident almashdi. Ko‘rinadiki nolegitim raxbar sifatida bu chorak asr davomida faqat Putin hokimiyatda qolmoqda. Rossiyaning muttasil agressiyasi bois o‘n yillik urush davomida ham bir necha bor Ukrainada demokratik saylovlar amalga oshdi. Biroq urushning aktiv fazasi kechayotgan, Ukraina okkupatsiya qilinayotgan so‘nggi davrda bunday saylov o‘tkazilishi mumkin emas. Ammo aftidan Putin bu haqda emas, Ukrainani yanchib yo‘q qilish haqida ko‘proq o‘ylayapti. 

«Men avval ham ularni ezib tashlashimizni, yo‘q qilishimizni aytgandim» deya aljirashda davom etdi Putin. Biroq u bu ish qo‘lidan kelmasligini ham pisanda qildi.

U o‘zining g‘arb hamkorlari atalmish oshnalariga ishonib xato qilishni istamasligi haqida gapirib, Yevropa hamisha uning «burnidan tortib yetaklashga» urinayotganidan nolindi. Biroq, albatta Yevropa bilan birga ishlashga tayyorligini ta'kidladi. 

Kreml raxbari iddaolariga Rasmiy Kievning javobi ko‘p kuttirmadi.

Hususan Ukraina prezidenti maslahatchisi Dmitriy Litvin Rossiya yetakchisiga avvalo zudlik bilan davolanishi lozimligini tavsiya qildi. 

«Agar Putin ushbu urushni to‘xtatish yo‘lida jiddiy harakat qilib, kim bilan hamkorlik qilishi kerakligini tushunishga intilayotgan bo‘lsa. U holda miya faoliyatini amalga oshirish uchun shunchaki bir nechta tabletka iste'mol qilishi kifoya— faqat agar unga endilikda dori kor qilgan taqdirda» deya pisanda qildi Ukraina prezidenti maslahatchisi Litvin.