ФУҚАРОНИ АЭРОПОРТГА ИШГА КИРИТМОҚЧИ БЎЛГАН “ТАНКА” ҚЎЛГА ОЛИНДИ

Тошкент халқаро аэропорти Авиация хавфсизлик хизмати қўриқлаш бўлинмаси назоратчиси пойтахтда истиқомат қилувчи фуқарони аэропортда фаолият юритувчи мансабдор танишлари орқали Қўриқлаш бўлинмаси назоратчиси лавозимига ишга киритиб қўйишини айтиб, эвазига 500 АҚШ доллари талаб қилади.

ДХХ ва ИЖҚК Департаменти ҳамкорлигида ўтказилган тезкор тадбирда ушбу уддабурон назоратчи талаб қилинган 500 АҚШ долларни олган вақтида ашёвий далиллар билан ушланди.

Дастлабки суриштирув давомида, мазкур шахс аэропортга ишга жойлаб қўйиш учун ўнга яқин фуқародан 500-1000 АҚШ доллари миқдорида пул олганлигига иқрор бўлди. 

Унга нисбатан Жиноят Кодексининг 168-моддаси 1-қисми ва 28,211-моддаси 1-қисми билан жиноят иши қўзғатилиб, тергов ҳаракатлари олиб борилмоқда. 

Маьлум бўлишича, у бир неча кишиларни худди шу вадалар билан алдаб пулини олиб келган. Қайтарганини қайтариб, қайтармаганини эрта-индин бераман деб, лаққиллатиб келган. 

Суриштирув жараёнида уни аэрапортда бирорта таниши ҳам йўқ ва ҳудудга киришга рухсати ҳам йўқ бўлиб чиқди. Ҳозирда ушбу шахсдан жабр кўрган бошқа фуқароларни аниқлаш юзасидан суриштирув ишлари олиб борилмоқда.