FUQARONI AEROPORTGA IShGA KIRITMOQChI BO‘LGAN “TANKA” QO‘LGA OLINDI

Toshkent xalqaro aeroporti Aviatsiya xavfsizlik xizmati qo‘riqlash bo‘linmasi nazoratchisi poytaxtda istiqomat qiluvchi fuqaroni aeroportda faoliyat yurituvchi mansabdor tanishlari orqali Qo‘riqlash bo‘linmasi nazoratchisi lavozimiga ishga kiritib qo‘yishini aytib, evaziga 500 AQSh dollari talab qiladi.

DXX va IJQK Departamenti hamkorligida o‘tkazilgan tezkor tadbirda ushbu uddaburon nazoratchi talab qilingan 500 AQSh dollarni olgan vaqtida ashyoviy dalillar bilan ushlandi.

Dastlabki surishtiruv davomida, mazkur shaxs aeroportga ishga joylab qo‘yish uchun o‘nga yaqin fuqarodan 500-1000 AQSh dollari miqdorida pul olganligiga iqror bo‘ldi. 

Unga nisbatan Jinoyat Kodeksining 168-moddasi 1-qismi va 28,211-moddasi 1-qismi bilan jinoyat ishi qo‘zg‘atilib, tergov harakatlari olib borilmoqda. 

Malum bo‘lishicha, u bir necha kishilarni xuddi shu vadalar bilan aldab pulini olib kelgan. Qaytarganini qaytarib, qaytarmaganini erta-indin beraman deb, laqqillatib kelgan. 

Surishtiruv jarayonida uni aeraportda birorta tanishi ham yo‘q va hududga kirishga ruxsati ham yo‘q bo‘lib chiqdi. Hozirda ushbu shaxsdan jabr ko‘rgan boshqa fuqarolarni aniqlash yuzasidan surishtiruv ishlari olib borilmoqda.