Санкт-Петербургда мигрантларга курьерлик қилиш тақиқланди

Россиянинг Санкт-Петербург шаҳрида ҳокимият мигрантлар учун меҳнат чекловларини кучайтириш сиёсатини давом эттирмоқда. Эндиликда уларга шаҳарда курьерлик фаолияти билан шуғулланиш ҳам ман этилади. Бу қарор етказиб бериш хизматлари нархининг 20% гача ошишига сабаб бўлиши мумкин, дея тахмин қилинмоқда.

11 август, душанба куни Санкт-Петербург губернатори Александр Беглов хорижий фуқароларни курьерлик хизматига жалб қилишни чеклаш тўғрисидаги қарорни имзолади. Гап патент асосида ишловчи мигрантлар ҳақида кетмоқда.

Такси соҳасидаги мавжуд чекловларга энди курьерлик хизмати билан боғлиқ бўлган фаолият турлари ҳам қўшилди. Бунга курьерлик (ОКВЭД 53.20.3), турли транспорт воситаларида курьерлик хизмати (ОКВЭД 53.20.31), уйга овқат етказиб бериш (ОКВЭД 53.20.32) ва бошқа курьерлик фаолияти (ОКВЭД 53.20.39) киради.

Ҳокимиятнинг расмий позицияси

Ҳокимиятнинг расмий баёнотига кўра, «етказиб бериш соҳаси фаол ривожланмоқда, аммо бу норасмий ва назорат қилинмайдиган бандликнинг катта ҳажмини келтириб чиқармоқда. Қабул қилинган қарор ноқонуний меҳнатга қарши курашиш, курьерлик соҳасидаги хизматлар сифати ва хавфсизлигини ошириш, шунингдек, Россия фуқаролари, биринчи навбатда, ёшлар ва талабалар учун янги иш ўринлари яратишга қаратилган. Статистикага кўра, хорижий курьерлар умумий ишчилар сонининг жуда кичик қисмини ташкил этади, шу сабабли бу чора етказиб бериш бозорининг барқарорлигига таъсир қилмайди», — дейилади хабарда.

Бозор иштирокчилари норози

Такси бозоридаги тақиқларга ўхшаб, янги қоидаларга мослашиш учун курьерлик хизмати билан шуғулланувчи компанияларга уч ойлик ўтиш даври берилган. «Деловой Петербург» нашрининг ёзишича, Смольний қарори бизнес учун кутилмаган бўлди. Компаниялар мигрант курьерларга тақиқ қўйилмайди, деб умид қилишаётган эди. Бунгача ҳам улар учун тезлик чеклови, ташқи кўринишга талаблар ва шахсий мобиллик воситаларида ҳаракатланиш учун тақиқланган ҳудудлар жорий этилган эди. Шаҳарнинг 18 та туманида, жумладан, барча яшил ҳудудларда бундай чекловлар мавжуд. Бизнес ҳали бу чекловларга мослашиб улгурмаган бўлса-да, янги қоидаларни бузганлик учун жарималар аллақачон ёзилмоқда.