Ўзбекистон тавқи лаънат тамғасидан қутилди

Супургини тикка қилиб қўйилса, бало-қазо келади деган ирим бор. Шу боис уни ëтқизиб қўйиш лозим. Энг камида учи қийшаймайди.

Каримов даврида Ўзбекистон тавқи лаънат осиладиган «ëмон ният оғочи» эди. Шундай тавқи лаънатлардан бири ҳануз осилиб бу мамлакат билан тўлақонли олди-соттию, борди-келдига ҳалақит қилмоқда.

Бу Ўзбекистонга жорий қилинган  Жексон-Вэник тамғаси.

Жексон-Вэник тузатиши — 1974 йилда АҚШнинг Савдо тўғрисидаги қонунига киритилган қўшимча бўлиб, у эмиграцияга (яъни мамлакатдан кўчиб чиқишга) тўсиқ қўювчи ёки инсон ҳуқуқларини бузувчи давлатлар билан савдо муносабатларини чеклашни назарда тутади.

Ҳужжат бу чорани таклиф этган конгрессменлар — Генри Жексон ва Чарльз Вэник шарафига шундай номланган.

АҚШ Сенатининг Халқаро ишлар бўйича қўмитаси раиси Жеймс Риш ушбу ҳафта АҚШ Конгрессига Марказий Осиё давлатлари, жумладан, Ўзбекистонга нисбатан Жексон–Вэник тузатишини бекор қилишини маълум қилди.

Шундай бўлсин. Ўзбекистонни яхши дейлик ва у яхшилансин. Урса эти, сўкса бети қотиб кетади.