Навоийда носозлик туфайли бутун дом музлади

Навоий шаҳрида 2025 йилнинг 3 ноябридан бошланиши керак бўлган иссиқлик мавсуми ортидан 10 кун ўтган бўлса-да, шаҳарнинг айрим ҳудудларида иссиқлик тизими тўлиқ ишламай турибди.

Элтузга Навоий шаҳри Зарафшон маҳалласи, Ибн Сино кўчаси 16-уйда яшовчи фуқаролар мурожаат қилишди. Улар таъкидлашича, уйда иссиқлик таъминоти кеча — 12 ноябрь куни берилган. Бироқ, ундан олдин уй ертўласида қувур ёрилиши сабаб шаҳар иссиқлик таъминоти ходимлари келиб, носозликни бартараф этишди, аммо ишни шошмашошарлик билан «мендан кетгунча, эгасига етгунча тарзида» бажаришди.

Фуқароларнинг сўзларига кўра, уй ёнидаги  қудуқда ишлар нотўғри бажарилгани сабаб тизим тўлиқ ишламай қолган. Бир неча марта қилинган мурожаатлардан сўнг Иссиқлик таъминоти корхонаси ва “Гулобод сити” ширкати вакиллари келишди, бироқ муаммони ҳал қила олмасдан ишни чала ҳолда ташлаб кетишди.

“Ҳурматли Навоий шаҳри иссиқлик таъминоти масъуллари, халқ шунча қийналиб турган бир пайтда, энди бу ҳолат нимаси? Қачон ишга масъулият билан ёндашасизлар?” 

— дейилади аҳоли мурожаатида.

Мазкур ҳолат бўйича вилоят ҳокимлигидан изоҳ кутамиз.