Ички ишлар тизимидаги чаламуллалар

Яқинда укам милицияга, аниқроғи, учаска нозирига ариза билан мурожаат қилган эди. Ариза мазмуни хақорат қилиш. Нозир хақорат, жиноят аломати йўқ деб аризани инобатсиз қолдирибди. Хақорат аниқ эди. Жаҳлим чиқиб учаска нозирига бориб аризада жиноят  аниқ кўрсатилганини айтдим. Нега жиноят аломати йўқ дегани билан қизиқдим. 

У менга:  — Мусулмонмисиз? —деди. 

— Ҳа, —дедим. 

— Мусулмон одам кечиримли бўлиши керак, — деди. 

— Тўғри айтасиз. Аммо айбдорни биз эмас, сиз кечирибсиз-ку. Шу ишингиз мусулмончиликка тўғри келадими?  Агар уни биз кечирганимизда бошқа гап эди, сиз эса давлат қонуни бўйича ҳулоса қилишингиз керак эди, мусулмончилик билан давлат қонунини аралаштириб юбориш ножоиз. 

У менга яна мусулмончиликдан, жаннат ва дўзаҳдан анча гапирди. 

Чамамда у милиция либосини кийиб олган чаламулла эди. 

— Агар ҳамма жиноятчини мусулмончилик деб, жаннатга тушаман деб кечириб юбораверсак, ҳаммаёқни жиноятчи босиб кетади.

Жазоланмаган жиноятчи итдай қутиради. Ислом динида ҳам шаръий қонунлар ва қозилар бўлади ва жиноятчилар жазоланади, — деб тушунтирмоқчи бўлдим. 

Аммо бир нарсани аниқ тушуниб бўлдим:  сиёсий ислом милиционерлар орасига тарқалиб бўлибди. Чунки биз устидан ариза берган кас бутун маҳаллани исломга ўтказаман деб ваҳима қилиб юрадиган даъватчи соқолтой эди. Милиция конституцияга зид гапириб юрган кимсани ҳимоя қилаётганди. 

— Мусулмончилигингиз, намоз ўқишингиз, умрани орзу қилишингиз яхши. Аммо сизларнинг дини исломга туғри келмайдиган қанча ёмон ишларинг бор. Сохта гувоҳ билан одам қаматасизлар,  бўлимларингда гумондорларни уриб ўлдирасизлар, пора эвазига жиноятчини ҳимоя қиласизлар. Шу ишларинг исломга, номозҳонликларингга тўғри келадими? 

Бу гапларим уни жаҳллантирди. Лекин бир нарса аниқ:  сиёсий, бетоқат ислом милиционерлар орасига тарқалиб бўлибди. 

Энди нима бўлади? 

Пайти келиб ИИВ ислом давлатига ўтамиз деб исён кўтармайдими? 

Аҳмадали Ғофуров