Ichki ishlar tizimidagi chalamullalar

Yaqinda ukam militsiyaga, aniqrog‘i, uchaska noziriga ariza bilan murojaat qilgan edi. Ariza mazmuni xaqorat qilish. Nozir xaqorat, jinoyat alomati yo‘q deb arizani inobatsiz qoldiribdi. Xaqorat aniq edi. Jahlim chiqib uchaska noziriga borib arizada jinoyat  aniq ko‘rsatilganini aytdim. Nega jinoyat alomati yo‘q degani bilan qiziqdim. 

U menga:  — Musulmonmisiz? —dedi. 

— Ha, —dedim. 

— Musulmon odam kechirimli bo‘lishi kerak, — dedi. 

— To‘g‘ri aytasiz. Ammo aybdorni biz emas, siz kechiribsiz-ku. Shu ishingiz musulmonchilikka to‘g‘ri keladimi?  Agar uni biz kechirganimizda boshqa gap edi, siz esa davlat qonuni bo‘yicha hulosa qilishingiz kerak edi, musulmonchilik bilan davlat qonunini aralashtirib yuborish nojoiz. 

U menga yana musulmonchilikdan, jannat va do‘zahdan ancha gapirdi. 

Chamamda u militsiya libosini kiyib olgan chalamulla edi. 

— Agar hamma jinoyatchini musulmonchilik deb, jannatga tushaman deb kechirib yuboraversak, hammayoqni jinoyatchi bosib ketadi.

Jazolanmagan jinoyatchi itday qutiradi. Islom dinida ham shar'iy qonunlar va qozilar bo‘ladi va jinoyatchilar jazolanadi, — deb tushuntirmoqchi bo‘ldim. 

Ammo bir narsani aniq tushunib bo‘ldim:  siyosiy islom militsionerlar orasiga tarqalib bo‘libdi. Chunki biz ustidan ariza bergan kas butun mahallani islomga o‘tkazaman deb vahima qilib yuradigan da'vatchi soqoltoy edi. Militsiya konstitutsiyaga zid gapirib yurgan kimsani himoya qilayotgandi. 

— Musulmonchiligingiz, namoz o‘qishingiz, umrani orzu qilishingiz yaxshi. Ammo sizlarning dini islomga tug‘ri kelmaydigan qancha yomon ishlaring bor. Soxta guvoh bilan odam qamatasizlar,  bo‘limlaringda gumondorlarni urib o‘ldirasizlar, pora evaziga jinoyatchini himoya qilasizlar. Shu ishlaring islomga, nomozhonliklaringga to‘g‘ri keladimi? 

Bu gaplarim uni jahllantirdi. Lekin bir narsa aniq:  siyosiy, betoqat islom militsionerlar orasiga tarqalib bo‘libdi. 

Endi nima bo‘ladi? 

Payti kelib IIV islom davlatiga o‘tamiz deb isyon ko‘tarmaydimi? 

Ahmadali G‘ofurov