Каримовнинг ўлими ҳукуматнинг пахта сиёсатига таъсир қилмади

Ўзбекистонда президент Каримов маъракалари тугаши биланоқ аҳолини пахта далаларига оммавий сафарбар қилиш бошланди. Биринчилардан бўлиб, 7-8 сентябр кунлари, пахта теримига мамлакат олий ўқув юртлари талабалари жўнатилди, бир неча кун ўтмай, айни тақдир давлат муассасалари ходимлари пешанасига ҳам ёзилди.

Ватанпарварлик кайфиятидаги имомлар анъанавий тарзда диндорларга мурожаат этиб, ҳосилни йиғиб олишда Ватанга ёрдам беришларини сўрашди.

Шу кунларда, пахтадан қолишга ҳеч бир чораси йўқ турли касб эгалари, итоаткорлик билан автобусларга чиқишади ва улар сергак милиционерлар назорати остида колонналарга сафлантирилиб пахта далаларига олиб чиқилади.

Ўта қайсар ва дангаса ватандошлар учун, ҳар ҳолда 50-150 доллар атрофида ўлпон тўлаш билан, пахта қуллигидан озод бўлиш имкони ҳам бор.

Халқаро ташкилотларнинг мажбурий меҳнат борасидаги танқидларига жавобан Ўзбекистон ҳукумати, турли касб эгаларининг, улар тиш докторлари ёки нейрожарроҳлар бўлсин, пахта теримига кўнгилли тарзда, қўшимча пул топиш учун чиқишаётганини айтишади.

Айни кунларда, пахта далаларига, фуқаролар билан гаплашиб, ҳақиқатан ҳам бу гапларнинг тўғрилигига ишонч ҳосил қилиш учун, Халқаро Меҳнат Ташкилоти вакиллари ҳам оралаган.

Фақат, ўртоқ пахтакорларнинг мамлакат рахбариятига панд бериб қўймасликларидан, жойлардаги турли текширувчиларга тўғри жавоблар берилишидан умидвор бўлиш қолади.

Ўзбекистонликлар бошлари устидаги мусаффо осмонни қадрлашади, ахир пахта кўнгилли равишда териб олинса, ҳар тарафдан уларга турли экстремистлар ҳужум қилиши мумкин.

Бизга тағин совет даври нашрларидаги, умумхалқ кучи билангина териб олиш мумкин бўлган пахтани шарафловчи расмлар ва шеърлардан завқ олиш қолади.

Акмал Ризаев,
Ўзбекистонлик муаллиф таҳаллуси,
Eltuz.com