Karimovning o‘limi hukumatning paxta siyosatiga ta'sir qilmadi

O‘zbekistonda prezident Karimov ma'rakalari tugashi bilanoq aholini paxta dalalariga ommaviy safarbar qilish boshlandi. Birinchilardan bo‘lib, 7-8 sentyabr kunlari, paxta terimiga mamlakat oliy o‘quv yurtlari talabalari jo‘natildi, bir necha kun o‘tmay, ayni taqdir davlat muassasalari xodimlari peshanasiga ham yozildi.

Vatanparvarlik kayfiyatidagi imomlar an'anaviy tarzda dindorlarga murojaat etib, hosilni yig‘ib olishda Vatanga yordam berishlarini so‘rashdi.

Shu kunlarda, paxtadan qolishga hech bir chorasi yo‘q turli kasb egalari, itoatkorlik bilan avtobuslarga chiqishadi va ular sergak militsionerlar nazorati ostida kolonnalarga saflantirilib paxta dalalariga olib chiqiladi.

O‘ta qaysar va dangasa vatandoshlar uchun, har holda 50-150 dollar atrofida o‘lpon to‘lash bilan, paxta qulligidan ozod bo‘lish imkoni ham bor.

Xalqaro tashkilotlarning majburiy mehnat borasidagi tanqidlariga javoban O‘zbekiston hukumati, turli kasb egalarining, ular tish doktorlari yoki neyrojarrohlar bo‘lsin, paxta terimiga ko‘ngilli tarzda, qo‘shimcha pul topish uchun chiqishayotganini aytishadi.

Ayni kunlarda, paxta dalalariga, fuqarolar bilan gaplashib, haqiqatan ham bu gaplarning to‘g‘riligiga ishonch hosil qilish uchun, Xalqaro Mehnat Tashkiloti vakillari ham oralagan.

Faqat, o‘rtoq paxtakorlarning mamlakat raxbariyatiga pand berib qo‘ymasliklaridan, joylardagi turli tekshiruvchilarga to‘g‘ri javoblar berilishidan umidvor bo‘lish qoladi.

O‘zbekistonliklar boshlari ustidagi musaffo osmonni qadrlashadi, axir paxta ko‘ngilli ravishda terib olinsa, har tarafdan ularga turli ekstremistlar hujum qilishi mumkin.

Bizga tag‘in sovet davri nashrlaridagi, umumxalq kuchi bilangina terib olish mumkin bo‘lgan paxtani sharaflovchi rasmlar va she'rlardan zavq olish qoladi.

Akmal Rizaev,
O‘zbekistonlik muallif tahallusi,
Eltuz.com