«Туя гўшти еган» қонун қабул қилинадими?

«Адолат» газетаси (05.08.16) қарийб 25 йилдан кутилаётган милиция тўғрисидаги қонун қабул қилиниши мумкинлиги тўғрисида мужда берди.
Газетанинг ёзишича, «Адолат» партиясининг Қонунчилик палатасидаги фракцияси йиғилишида «Ички ишлар органлари тўғрисида»ги қонун лойиҳаси муҳокама қилинди.

Йиғилиш баёнида нега шунча йиллардан бери бундай қонун қабул қилинмагани сабаблари кўрсатилмаган бўлса-да, уни тайёрлашга бу ҳақдаги топшириқ давлат раҳбаридан келганидан сўнг киришилганига аниқ ишора бор.

Яъни конституциянинг 23 йиллигига бағишланган тантанали маросимда Ўзбекистон президенти «шу кунгача ички ишлар ва ҳуқуқ-тартибот органлари фаолиятини тартибга соладиган қонуннинг йўқлиги»ни эслатиб, бу ҳақда таклифлар берганидан кейин ниҳоятда зарур бу ҳужжатни қабул қилиш ҳаракатлари бошланган.

«Ҳозирги кунда Ўзбекистон Республикаси ҳудудида ички ишлар органлари ва уларнинг ходимлари фаолиятини тартибга солувчи 94 та норматив ҳужжат мавжуд… Айтиш мумкинки, сезиларли ҳажмдаги норматив-ҳуқуқий ҳужжатлар базасининг тарқоқлиги, ички ишлар органларининг ҳуқуқий асослари бир бутун тарзда шакллантирилмагани ягона ҳуқуқни қўллаш амалиётини таъминлаш имкониятини бермаяпти», дея ёзғиради «адолатчилар».

Партия вакилларининг сўзларига кўра, миллий ва хорижий тажрибалар инобатга олинган бу қонун лойиҳаси «Ўзбекистон Республикасида биринчи бор ички ишлар органлари ва унинг ходимларининг ҳуқуқий мақомини қонун даражасида мустаҳкамлашга, уларнинг ижтимоий зарурати ва аҳамиятини эътироф этишга қаратилганлиги билан аҳамиятлидир».

Албатта, ҳечдан кўра кеч бўлса-да, яхши ишнинг амалга оширилгани маъқул. Бу қонунни нафақат мустақил ҳуқуқ ҳимоячилари, балки мақоми шу вақтгача ҳуқуқий жиҳатдан юқори даражада мустаҳкамлаб қўйилмаган ички ишлар органларининг ўзлари ҳам интиқлик билан кутмоқда.

Лекин қонун қабул қилингани билан унинг ижроси ҳаётда ўз аксини топмаса, бошқа кўплаб қонунлар қатори бу ҳуқуқий ҳужжат ҳам бир қоғоздек бўлиб қолмасмикин!?

Eltuz.com