Пенсия жамғармаси ёлғони фош бўлди

«Адолат кўзгуси» газетаси анча вақтлардан буён пенсияси ёки нафақа пуллари ўзларининг розилигисиз пластик карточкага ўтказиб берилаётгани, бу эса турли ноқулайликлар туғдираётганидан шикоят қилган фуқароларнинг мурожаатларига мутасаддиларининг жавобларини эълон қилиб келади.

Аксарият ҳолларда бу шикоятлар турли баҳоналар билан ҳал этилмасдан ёки тўлиқ ҳал этилмасдан қолиб кетаётганига гувоҳ бўлардик.

Газетанинг навбатдаги сонида ҳам (2.02) Сурхондарёнинг Ангор туманилик пенсионернинг бу борадаги шикоятига жавоб эълон қилинди.

«Пластик карточканинг афзалликлари тушунтирилди» сарлавҳали мақолада гарчи шикоятчи пенсия пули ўзининг розилигисиз банк картасига ўтказилаётганини айтса-да, Пенсия жамғармасининг Сурхондарё вилояти бошқармаси бошлиғи бунинг тескарисини билдирган.

Яъни пенсия шикоятчининг ўз аризасига кўра ва банк билан имзоланган шартномага асосан пластикка ўтказиб берилаётганини маълум қилган.

Ўзбекистонда пенсия, нафақа ва иш ҳақлари мажбуран пластик карточкага ўтказиб келинаётгани аслида ҳеч кимга сир эмас. Лекин мутасаддилар кўзини лўқ қилиб «ўз розилиги билан ўтган», деяверади.

Пенсия жамғармасидагиларнинг яна «пластик карточканинг афзалликларини тушунтиргани»га нима дейсиз.

Буни «тушунмаган» президент эса куни-кеча пенсия ва нафақаларни фақат нақд пулда бериш тўғрисида қарор қабул қилиб ўтирибди.

Энди Пенсия жамғармаси бошлиқлари ўз ёлғонидан тонадими ёки пластикнинг афзалликларини «кўра олмаган» президентдан норози бўлиб, дардини кимга айтишни билмай ич-этини еб юраверадими?!

Баҳодир Шариф
Ўзбекистонлик газетхон таҳаллуси
Eltuz.com