Бош вазир «Мерседес»и «Дамас» билан тўқнашди (янгиланди)

Ўзбекистон бош вазири Абдулла Арипов минган «Мерседес» 20 август куни Бекобод-Тошкент йўлида «Дамас» енгил автомобили билан тўқнашган.

Ички ишлар идорасининг расмий хабарида авария 31 яшар Б.Саидов бошқарувидаги «Дамас» автомобилининг «қарама-қарши йўлга чиқиб кетиши сабабли содир бўлгани» билдирилади.

Натижада 66 яшар Р. Толипов бошқарувидаги «Мерседес-Бенс» чап ёни билан «Дамас»га урилган.

Тўқнашув оқибатида машинадаги уч нафар шахс – Р.Толипов, А.Султонов ва У.Қурбонов, шунингдек, “Дамас” автомобили ҳайдовчиси Б.Саидов ва унинг йўловчиси А.Мелибоев жароҳат олиб, шифохонага ётқизилган.

ИИВ хабарига кўра, ҳодиса пайтида машинада бўлган Ўзбекистон Республикаси бош вазири А.Арипов «соғлиғининг бузилишига сабабчи бўлмаган» енгил тан жароҳати олган.

Бундан илгари «Элтуз» нашри иккиламчи манбаларга таяниб, «Дамас» ҳайдовчиси жабрланмаган, деган хабар тарқатган эди.

Рассом Кирпи
Eltuz.com