Вазирни танқид қилган блогер куёвга жиноят иши очилди

Тошкент вилоятининг Ўртачирчиқ туманида яшовчи 31 яшар Мирсаид Ҳайдаров ижтимоий тармоқ орқали ахборот технологиялари ва коммуникацияларини ривожлантириш вазири Шуҳрат Содиқовни танқид қилгани учун туҳмат ва ҳақоратда айбланаётганини айтмоқда. 

24 июнь куни унга нисбатан ЖКнинг 139-моддаси 2-банди (оммавий ахборот воситалари орқали туҳмат) бўйича жиноят иши очилган.

Ҳайдаровнинг “Элтуз” нашрига билдиришича, бунга унинг “Озодлик”да эълон қилинган “Ўзбекистонда вазир ва оддий фуқаро бирга яшай оладими?” сарлавҳали видеоси сабаб бўлган.

Видеода у тумандаги йўлларнинг расволиги ва айни маҳаллада фақат вазир Ш.Содиқовнинг уйи атрофи асфальт қилингани ҳақида гапиради. Айни видеода фактлар кўрсатилади. Вазирга нисбатан туҳмат ёки ҳақоратли сўзлар йўқлигини эътироф этиш мумкин.

Бош прокуратуранинг “Дарё.ўз” нашрига берган изоҳига кўра, жиноят иши очилишига Ўртачирчиқ туманининг Қурама овул чувулдоқ МФЙ Саховат кўчасида яшовчи Н.С. ва унинг укаси Р.М.нинг Ҳайдаровга чора кўришни сўраб ёзган аризаси сабаб бўлган.

Унда, шунингдек, Ҳайдаров фарзандларини кўриш баҳонасида собиқ хотини (вазир Ш.Содиқовнинг қизи) яшаётган хонадонда мунтазам жанжал чиқариб, турли идораларга туҳматдан иборат аризалар билан мурожаат қилиб келаётганлиги айтилади.

“Мазкур жиноят иши қўзғатилишига ижтимоий тармоқларда 12 июнь куни эълон қилинган “Ўзбекистон вазир ва оддий фуқаро бирга яшай оладими?” видеони кўриб фикр билдиринг!” сарлавҳали видеоролик асос бўлмаган ҳамда видеороликнинг жиноят ишига алоқаси мавжуд эмас”, дейилади Бош прокуратура изоҳида.

Ҳайдаровнинг “Элтуз”га айтишича, бу гаплар прокуратура томонидан оммавий ахборот воситаларини чалғитишдан бошқа нарса эмас. Чунки Ўртачирчиқ тумани ИИБ тергов бўлимининг унга танишиш учун берилган, уни айбланувчи тариқасида иштирок этишга жалб қилиш тўғрисидаги қарорида бу ҳолат аниқ қилиб ёзиб қўйилган:

“М.Ҳайдаров туҳмат қилиш, яъни била туриб, собиқ турмуш ўртоғи Н.Содиқованинг отаси Ш.Содиқовни ва унинг оила аъзоларини шарманда қиладиган асоссиз уйдирмаларни Интернетдаги Telegram ижтимоий тармоғи орқали нашр қилиб, “Озодлик” радиосининг Telegram ижтимоий тармоғига юбориб, “www.facebook.com” ижтимоий тармоғи орқали тарқатилишига эришган”.

Айни айблов Ҳайдаровга нисбатан ЖКнинг 139-моддаси 2-банди бўйича жиноят иши очилишига сабаб бўлгани таъкидланади жумладан тергов қарорида.

Eltuz.com