ДБҚ раҳбарлари ҳақидаги эълон юзасидан билдирув

Бугун @eltuz Ўзбекистон Давлат Божхона Қўмитаси раҳбарияти иши юзасидан суриштирув олиб борилаётгани ҳақида хабар берган эди.

Суриштирувлар  ниҳоялаб қолган ва ДБҚ раҳбарияти ҳақидаги мақола келгуси ҳафта сўнгига қадар нашр қилиниши режалаштирилган эди.

Олинган янги маълумот, фактлар ва ҳужжатларни синчиклаб ўрганиш чоғида @eltuz таҳририятга йўлланган дастлабки маълумотларнинг аксари бўҳтон ва уйдирма айбловларга асосланганини аниқлади.

Маълум бўлишича, @eltuz га йўлланган мазкур уйдирма айбловлар ортида Давлат Божхона Қўмитасида раҳбар лавозимларда ишлаётган ва аввал ишлаган бир гуруҳ шахслар турибди.

Бир неча ой олдин ДБҚга раис этиб тайинланган Акмалхўжа Мавлонов қўмитада илдиз отган коррупцияга қарши аёвсиз кураш бошлаган.

Унинг принципиаллиги ва муросасизлиги ўз ваколатларидан фойдаланиб, узоқ вақт давомида давомли ва йирик даромад кўриб келган қўмитадаги баъзи масъул ходимларнинг норозлигини уйғотган.

Айнан мана шу норозилик уларни ДБҚ раисига қарши “юмалоқ хат” йўллашга асос бўлган.

Бироқ, улар тақдим этган фактлар ўз исботини мутлақо топмагач, @eltuz ўзининг бугунги эълонини олиб ташлашга қарор қилди.

Акмалхон Мавлоновга нисбатан қўйилган ассоссиз айбловлар ва нотўғри маълумотлар текширилмасдан чоп қилингани учун @eltuz ДБҚ раисидан самимий узр сўрайди.

@eltuz ДБҚда туб ислоҳотлар бошлаб юборган Акмалхўжа Мавлонов ишига омад ва муваффақиятлар тилайди.

@eltuz