KАМБАҒАЛЛИКНИ ҚИСҚАРТИРИШ ТИЗИМИДА… КАМБАҒАЛЛИККА ЮЗ ТУТАЁТГАН ХОДИМЛАР!

Тошкент шаҳар Бандлик бошқармаси ва унга қарашли туман бўлимларида ишлаётган баъзи раҳбарлар ўз иш жойида ҳимоясиз қолганини, порахўрлик ва адолатсизлик қурбонига айланганини айтишмоқда. Уларнинг сўзларига қараганда, айни пайтда улар «камбағалликни қисқартириш» тизимида ишлаб, аксинча, ўзлари камбағалликка юз тутаётган ходимлардандир.

Элтуз таҳририятига йўлланган мурожаатда айтилишича, бу ҳолат 2025 йилнинг февраль ойидан бошлаб янада оғирлашган. Айни даврдан бошлаб Тошкент шаҳар Бандлик бошқармасига ўзини «Марказий банк раисининг ўринбосари» деб таништирадиган Якуб Шакиржанович Бабажанов келган ва туман бўлимлари раҳбарларини турли босимларга дучор қилган.

Айни вақтдаги Камбағалликни қисқартириш ва бандлик вазири Ботир Зоҳидов билан яқинлиги қайд этилган Якуб Бабажанов бу тизимга «банкирлик» фаолиятидан келган. Манбаларга кўра, у банкда ишлаган пайтда 1,5 миллиард сўмлик ипотека кредити олган ва бандлик тизимига ўтгач, бу қарзини ёпиш учун туман раҳбарларига ноқонуний «груз» қўйишни бошлаган.

Мурожаатда таъкидланишича, ҳар ойда турли ҳисоб-китоблар орқали, ишсизлик нафақаси ва касбга ўқитиш маблағлари ҳисобидан раҳбарларга 500 АҚШ доллари миқдорида пора йиғиш мажбурияти юкланган. Ҳаттоки 2025 йил 28 апрель куни Якуб Бабажановнинг туғилган кунига туман раҳбарларидан 100 АҚШ долларидан йиғиб беришган.

Агар имкони бўлса, Якуб ака икки фарзандингизни оддий давлат мактабига беринг. Хусусий мактаб учун ҳар ой 10 миллион сўм тўлаш ўрнига, бу халқнинг оғир аҳволини ўйласангиз бўларди,— дейилади мурожаатда.

Ходимлар айтишича, бу каби раҳбарлар ўз манфаатларини халқ манфаатидан устун қўйишмоқда. «Тошкент шаҳрида шу йил мобайнида камбағалликдан чиқарилган бирор оила борми?» деган савол қўйилмоқда мурожаатда.

Якуб ака ва унинг шогирдлари халқ дардини эмас, фақат шахсий манфаатни ўйлашмоқда. Улар телефон қилиб туман раҳбарларидан пул талаб қилиш ўрнига, халқ ва давлат хизмати ҳақида ўйлаши керак,— дейилади мактубда.

Мурожаат охирида барча туман раҳбарлари номидан Элтуздан ёрдам сўралган: «Илтимос, овозимиз бўлинг. Бу адолатсизликка нуқта қўйиш вақти келди».