CАРДОР СУЛТОНГА АЙЛАНАДИМИ?

Туркманистонда амалдаги президент Сардар Бердимуҳамедовга султон унвонини бериш, бутун ҳукмрон оилани эса “абадий шоҳлар” мақоми билан тақдирлаш таклифи янгради. Бу ҳақда туркман ОАВлари хабар тарқатди.

Ушбу ташаббус 29 июнь куни янги Аркадаг (Орқатоғ) шаҳрида миллат етакчиси Гурбангули Бердимухамедовнинг туғилган кунига бағишланган тантаналар пайтида янгради. 

Туркманистон халқ артисти Жемал Сапарова саҳнада қўшиқ ижро этиб, шундай чақириқ билан чиқди: “Туринг, бош эгинг, Сардар олдида. У умрбод султон бўлсин. Султонга тож кийдиринг!” 

Тез орада бу чиқишнинг видеоси “Аркадаг” телеканали орқали намойиш этилди. Мазкур мусиқий тарона тезда оммалашиб, бошқа ижодкорлар томонидан ҳам кенг ижро этила бошлади.

2022 йилдан буён мамлакатни бошқараётган Сердар Бердимухамедов ҳозирча расмий унвонга эга эмас. Отаси Гурбангулини Оркадаг (Орқатоғ) деб аташади. Туркманистоннинг биринчи президенти Самармурод Ниёзовга Туркманбоши мақоми берилган эди. 

Таҳлилчилар фикрига кўра, “тож кийгизиш” ғояси аслида Сардорнинг ўзига эмас, балки давлатни аввал бошқарган ва ҳали ҳам туркман сиёсатининг таъсирли фигураси бўлиб қолган унинг отаси — Гурбангули Бердимуҳамедовга қаратилган бўлиши мумкин.