ПРОКУРАТУРА “ҚЎЛЛОВИ” СОЯСИДАГИ НОҚОНУНИЙ ҚУРУЛИШ

Тошкент шаҳар Мирзо Улуғбек тумани, Гулирайхон кўчаси 37-уй аҳолиси бир неча ойдан буён яқин атрофда олиб борилаётган ноқонуний қурилишдан азият чекмоқда. Гап 1-Пилла кўчаси, 26-уйда яшовчи фуқаро Л.М. Мирошниченко томонидан амалга оширилган ўзбошимча турар-жой қурилиши ҳақида бормоқда. Барча қонуний тартиблар четлаб ўтилган, маҳалла фуқаролари эса ўз ҳавлисининг дахлсизлигидан маҳрум бўлмоқда.

Яшаш ҳуқуқининг ўзагини ташкил этувчи хавфсизлик, осойишталик ва қонун устуворлиги принциплари бу ҳолатда қаттиқ бузилган. Энг ачинарлиси — тегишли идораларга қилинган мурожаатлар эътиборсиз қолмоқда. Маҳаллий аҳоли орасида тарқалаётган гап-сўзларга кўра, ноқонуний қурилишга йўл қўйган фуқаронинг ортида “прокуратурада ишлайдиган танишлар” турган бўлиши мумкин. Бу эса масалага янада жиддийроқ ёндашишни талаб қилади.

Тошкент шаҳар Қурилиш бош бошқармаси томонидан 2025 йил 27 июнда расмий огоҳлантириш хати берилган. Унда фуқарога қурилишни 15 кун ичида ўз хоҳиши билан бузиш талаби қўйилган. Акс ҳолда, судга мурожаат қилиниши билдирилган. Аммо бу ҳужжатнинг ижроси ҳанузча кўзга ташланмаяпти. Демак, расмий огоҳлантиришлар қоғозда қолмоқда, муаммо эса бартараф этилмади.

Шу ерда бир савол туғилади: агар оддий фуқаро томорқасида кичик бир қурилиш қилса, бунга дарҳол жавоб берилади. Аммо кимдир “кимнидир таниши” орқали қонунлардан устун турса-чи? Бу қонунчилик тенгсизлиги эмасми?

Маҳаллани ўзгартириш, замонавийлаштириш эмас, балки бетартиб ва мутасаддиларнинг эътиборсизлиги туфайли бундай қурилишлар аҳоли дахлсизлиги ва хавфсизлигига таҳдид солмоқда. Ўз ҳовлиларига қуёш тушишини кутган, болалари билан сокин яшашни истаган оилалар энди балкон соясида қолмоқда.

Қурилиш қонунчилиги барча учун баробар бўлиши керак. Гап фақат бино эмас, балки жамият ишончи ҳақида. Агар бу масалада тегишли чора кўрилмаса, бу ҳолат бошқаларга ҳам ёмон “намуна” бўлиб хизмат қилади.