ЯНДЕКС ВА СОЛИҚ ҚЎМИТАСИ БИРЛАШИБ ҲАЙДОВЧИЛАРНИ АЛДАЯПТИМИ?

Яндекс Доставка хизматида ишлайдиган ҳайдовчи Кудратхон Шухратхонович Элтузга мурожаат йўллаб, Яндекс ва Солиқ қўмитаси ўртасидаги шубҳали ҳамкорлик ҳақида маълум қилди.

Ҳайдовчининг таъкидлашича, у ва унга ўхшаган кўплаб ҳайдовчилар Яндекс платформасида ўзини ўзи банд қилган шахс сифатида рўйхатдан ўтиб ишлашади. Бу ҳолатда улар қонуний 18,5% солиқ тўлайди. 

Аммо Яндекс Доставка иловасида ҳар 3-4 кунда мажбурий face-текширув жорий қилинган.

«Face–текширувдан ўтганимиздан кейин 2–3 кун ўтиб, Солиқ қўмитаси платформаси орқали ўзини ўзи банд қилган мақомимиз бекор қилинади. Шунинг оқибатида 18,5% ўрнига 32–33% миқдорида солиқ ундирилади. Бу ҳақида огоҳлартириш ҳам берилмайди», — дейди ҳайдовчи.

Кудратхон Шухратхоновичнинг сўзларига кўра, ўзини ўзи банд қилганлик мақомнинг бекор қилиниши натижасида нафақат асосий солиқ миқдори ошади, балки ҳар бир мижоздан қўшимча 12% даромад солиғи ҳам олинади.

«Бу Яндекс ва Солиқ қўмитасининг ноқонуний ҳаракатлари, улар тил бириктириб ҳар томонлама ҳайдовчиларни шилишяпти. Чунки Яндекс face текширувидан ўтсак, мақомимиз ўзгариб, солиқ ошиши ҳақида хабар бермайди, бу борасида айёрларча сукут сақлайди. Мақсад — ими-жимида ортиқча солиқ ундириш», — деб ҳисоблайди у.

Ҳайдовчи бу ҳолатни ўз вақтида аниқлаб, Яндекс компаниясига эътироз билдирган. Яндекс эса айбни Солиқ қўмитасига ағдарди.

«Қўлимда бу схемани исботловчи барча далиллар бор. Агар бу Яндекс ва Солиқ қўмитасининг бу тузоғини кенг жамоатчиликка ошкор қилсак, бутун республика бўйича минглаб таксистлар ҳақ-ҳуқуқини талаб қила бошлайди», — дейди мурожаатчи

Ўзини ўзи банд қилган киракашни атайин ҳар томонлама «талаш» фикри кимдан чиқди, жаноб Қутбиевданми ёки Яндекс Ўзбекистон раҳбари Иззат Шукуровданми?