Толибон аёллар муаллифлигидаги китобларни тақиқлади

UNESCO маълумотларига кўра, Афғонистонда Толибон ҳукмронлиги бошлангандан бери 2,2 миллион қиз ўрта ва олий таълимдан четлатилган.

Янги хабарларга кўра эса, университетларда аёллар муаллифлигидаги китоблар тақиқланибди. Ҳатто “Кимё лабораториясидаги хавфсизлик” деган соф илмий китоблар каби ҳам. Бундан ташқари, “инсон ҳуқуқлари” ва “жинсий таъқиб” мавзулари ҳам дарслардан чиқарилмоқда.

Бу фақат таълим эмас, жамиятда инсонларнинг маънавий ва интеллектуал саломатлиги ҳам заифлашади, демакдир. Илмий асарлар ва фикрлар аёл муаллиф томонидан ёзилгани учунгина тақиқланиши — инсон ҳуқуқларини рад этишнинг замонавий дунё кўриб турган энг чўққисидир. Бундан баттари бўлмаса керак!

Бундай чекловлар оқибати нима бўлади? Таълимнинг чекланиши, ихтисослашув имкониятларининг йўқолиши, малакали кадрлар етишмаслиги — барчаси иқтисодий ўсиш ва ижтимоий барқарорликка салбий таъсир қилади. Нафақат жамиятни, балки давлатнинг ўзини ҳам заиф ва қарам қилади. Замонавий дунёда, илм-фан олдида энг кучли қуроллар ҳам ожиз қолаётган даврда, Афғонистондаги бу чекловлар дунёни ҳам ташвишга солмоқда.

Яхшиямки, Ўзбекистон – дунёвий давлат. Бу тамойилнинг мазмунини кўпчилик тушунмайди. Конституциямизда дунёвий давлат принципи алоҳида таъкидланган. Давлатимиз илм-фан ва таълимдаги чекловларсиз имкониятлар яратишда жадал кетмоқда. Қизлар таълимига эътибор, уларга олий таълимда имтиёзлар, “Рақамли авлод қизлари” каби дастурлар нақадар аҳамиятли эканини яхши англаш керак. Дунёвийлик шу бўлади!

Агар давлат таълимда гендер камситиш ва фикрлар чекловига йўл қўйса, жамият ўзининг интеллектуал, иқтисодий ҳамда инсон ҳуқуқлари билан боғлиқ келажагини йўқотади. Бундай ҳолатларга қарши бўлиш — барча фуқароларнинг бурчи. Дунёвийлик — бу ҳақиқат ва имкониятлар тенглигининг кафолати.