Почтанинг еб ютилган пуллари ёш оператор бўйнига илиндими?

Ўзбекистон почтасининг Наманган филиали шаҳар почта алоқа боғламасида оператор бўлган Бахрамжанова Мусалламхон Салохитдин қизи деярли 153 миллион сўмни талон-торож қилганликда айбланди.

Ушбу маблағ фуқароларнинг коммунал тўловлари, почта хизмати учун тўловларидан шаклланган. Оператор Бахрамжанова кунлик ҳисоботларга жами 9 минг 634 дона тўлов чекини илова қилмаган дейилади суд ҳужжатларида. Тўловлар эса асосан нақд пулда бўлгани учун, пул келиб тушганини электрон тасдиқлаш имконсиз.

Айбланувчининг ўзи ҳар кунлик ҳисобот ва тушумни ҳисобчига ва кассирга топширгани, баъзи ҳолларда чек илова қилишни унитган бўлиши мумкинлигини таъкидлади. Бироқ суд ҳужжатлари ҳисобчи Ойбекнинг ҳам, кассир Аъзамжонинг ҳам камомадга алоқадорлигини тасдиқламади.

Камомад айнан оператор сабаб юзага келганини алоқа боғламаси раҳбари тасдиқлаб кўрсатма берди. Унинг сўзларига кўра, оператор кунлик ҳисоботларга нақд пул тўловлари чекларини палапартиш илова қилган. 9 мингдан ортиқ чек етишмаяпти ва шу чеклар ортидаги нақд пул тўлови ҳам кирим қилинмаган.

Шу асосда 28 яшар оператор – Бахрамжанова Мусалламхон Салохитдин қизи талон-торожда айбдор деб топилди. 153 миллион сўм камомаднинг 27 миллиони Мусалламхондан ундирилди. Қолган камомад маблағни тўлаб бериш шарти қўйилди.

Шунингдек, Наманган шаҳар суди ҳукми билан почта оператори Бахрамжанова Мусалламхон Салохитдин қизи 2 йилга озодликдан маҳрум қилинди.