800 $ минг пора билан ушланган собиқ ҳоким озод этилди

2025 йил июль ойида Давлат хавфсизлик хизмати томонидан пора билан ушланган Жиззах вилояти Шароф Рашидов тумани ҳокими Маҳмуд Холбўтаев озодликка чиққан. Унинг уйидан топилган 800 000 АҚШ доллари миқдоридаги нақд пул ҳам қайтарилгани хабар қилинмоқда.

Бу ҳақда 26 октябрь куни Элтуз таҳририятига етиб келган ишончли маълумотда қайд этилишича, собиқ ҳоким ҳозирги кунда жамоат тадбирларида эркин қатнашмоқда. Хусусан, гувоҳлар уни Жиззах давлат политехника институтидаги тадбирда кўришган.

Бундан аввал, 9 июль куни Элтуз ДХХ томонидан ўтказилган тезкор тадбир ҳақида хабар берган эди. Унда ҳоким Холбўтаев ва унинг ҳамтовоғи – туман ҳокимлиги бош мутахассиси Нодир Имомқулов, 30 000 доллар пора талаб қилганликда гумонланиб, жиноят устида қўлга тушгани ёритилган.

Машинадан чиққан пул, ҳибсга олинган ҳайдовчи

Маълумотларга кўра, Холбўтаевга берилган поранинг бир қисми — 10 000 долларини ҳайдовчиси Алимов Азиз олган, қолгани эса у автомашинага жойлаштираётган пайтда қўлга тушган. Ҳодиса жойидан қўшимча равишда 800 000 АҚШ доллари миқдоридаги нақд пул аниқланган ва ҳоким, мутахассис ҳамда ҳайдовчи жиноий жавобгарликка тортилганди.

Бироқ энди, фуқаролик жамиятида катта шов-шувга сабаб бўлган ушбу иш ғалати тарзда “йўқолиб” кетди: ҳоким озод, пул қайтарилган, жавобгарликка эса ҳайдовчи Алимов Азиз тортилган.

Суд-терговга ишонч сўроқ остида

Айни пайтда бу воқеа жамоатчилик орасида жиддий эътирозларга сабаб бўлмоқда. Порахўрлик айби билан қўлга олинган мансабдорнинг озод этилиши, у билан боғлиқ пуллар қайтарилиши, жазони эса эҳтимол унга мансуб ҳайдовчи ўтаётгани — суд-тергов тизими шаффофлигига жиддий соя ташламоқда.

Бу ҳолат Ўзбекистонда коррупцияга қарши кураш қандай даражада ва кимларга нисбатан амалга оширилаётганини яна бир бор савол остига қўяди.

Элтуз таҳририяти мазкур ҳолат бўйича расмий изоҳларни кутади.