Томи учган намунали уйларни ким таъмирлаб беради?

2021 йилнинг 19 март куни Қашқадарё вилоятининг Нишон туманидаги Янгиҳаёт массивида намунали уйларнинг томини шамол учириб кетган. Уйлар қурилиши 2016 йилда бошланиб, 2017 йилда тугалланган ва кредит асосида 2018 йилдан фуқароларга топширилган.

Массив турғунларининг “Элтуз”га айтишича, намунали уйларнинг деворлари аллақачон яроқсиз ҳолга келиб қолган. Ери беунум. Деҳқончилик билан шуғулланиб бўлмайди.

“Нишон тумани ҳокимлигига массив муаммоларини айтиб чиқсак, бизни эшитгиси келмайди, – дейди исмини сир тутишни сўраган фуқаро. – Ер унумсизлигини айтсак, 5-6 йил минерал ўғитлар билан озиқлантирсанглар, ерларинг унумдор бўлади, дейди.

Деворларимиз нураб кетяпти, ёрилишни бошлаган, десак, девор ўзингизники, одамлар ўз уйини ҳар йили таъмирлайди, бу ёғига ўзларингиз амалланглар, дейди. Биз ҳар ойда кредит тўлаб қийналяпмиз.

Ҳозирдан канализация ишдан чиққан, деворлар бу аҳволда. Шамол бўлса, томнинг бир қисмига зарар етади. Қурувчилар “биздан кетгунча, эгасига етгунча” қабилида иш қилган”.

– Тумандаги Янгиҳаёт массивидаги уйлар бир неча бор таъмирлаб берилган, – деди ҳокимлик вакили “Элтуз”нинг мурожаатига жавобан. – Туманда катта-катта қурилиш ишларини кетяпти. Массивни бунёд этган қурилиш фирмаси бошқа ишлар билан банд. Ўнлаб мурожаатчиларнинг томи таъмирлаб берилган. Уйдаги камчиликлар ўрганилиб, ёрдам кўрсатилган.

Фуқаро Гулсанам Равшанованинг сўзларига кўра, уйининг томи шамолда учиб кетиши биринчи маротаба эмас. Аввал ҳам шу ҳол кузатилганда мутасаддилар келиб, таъмирлаб беришган. Аммо бу ҳол яна такрорланган.

– 2018 йилдан бери шу уйда яшаймиз, – дейди Гулсанам Равшанова. – Ўша йилнинг ўзида (11 май куни) уйимиз томини шамол учириб кетган. Ҳокимликка арз қилганимиздан сўнг қурилиш фирмасидагилар томни ёпиб берди. 2021 йил 19 март куни томимизни яна шамол учириб кетди.

Унинг билдиришича, бу ҳақда бир ойдан буён мурожаат этилаётганига қарамай, ҳеч қандай иш қилинмаяпти. Фирмадагилар пинагини бузмайди. Ҳоким эса табиий офат-да, дейишдан нарига ўтмаган.

Гулсанам Равшанова эри давлат ишида ишлаши, тўрт фарзанди борлиги, улардан орттириб уйни қайта-қайта таъмирлашга оилада ортиқча маблағ йўқлигини таъкидлади.

“Ҳозирдан юрагимга ваҳима тушяпти. Кредит тўлаб бўлгунга қадар уйларимиз қай аҳволга келиб қолар экан?” деди у.

Eltuz.com