Ибрат Сафо: Ўзбекнинг қаровсиз болалари

Журналист Ибрат Сафо ёзади: Ўзбекистонда 8 ой ичида 25 минг нафарга яқин бола ота ёки онасиз яшашга мажбур бўлибди.

Оила ва хотин қизлар қўмитасининг ЎзАга маълум қилишича, мамлакатдаги “оилавий ажрашишлар сабаб”, жорий йилнинг ўтган 8 ойида 25 минг нафарга яқин болалар ота ёки онанинг тўлиқ меҳридан бебаҳра қолмоқда.

Лекин негадир четга чиқиб ишлаётганларнинг фарзандлари йиллаб, баъзи ҳолларда ҳам отаси, ва ҳам онасини кўрмай ўсаётгани ҳисобга олинмабди. Уларни юз минглаб дейиш мумкин. Ҳулқи туфайли махсус колонияда ўқитиладиганлар мактабида ишлаётган бир танишимнинг айтишича, у ерга асосан ота-онаси четда ишлаётганларнинг болалари тушяпти. Айниқса ўсмир қизлар аҳволи жуда аянчли, чунки қаровсиз қизга жамиятда қандай жинсий тажовузлар бўлиши ҳаммага маълум.