Тошкентда тўрт нафар диндор суд қилинмоқда

21 декабр куни Тошкент шаҳар судида Даврон Норбоев ҳакамлигида диний экстремизмда айбланаётган тўрт нафар шахс устидан суд давом этди.

Ўзбекистон Мустақил Ҳуқуқ Ҳимоячилари ташаббус гуруҳи (ЎМҲҲТГ) рахбари Сурат Икромов суриштирувда судланувчиларнинг айблари ўз исботини топмаётганини билдирди.

Барча судланувчилар Тошкент ШИИБ томонидан 2016 йилнинг августида ҳибсга олинган, уларга «15 суткалик» жазо расмийлаштирилиб, тергов хибсхоналарида қийноқларга тутилган, терговда уйдирилган айблар бўйича ишлар туман судларида кўрилгани айтилади ЎМҲҲТГ пресс релизида.

Шунингдек, Ҳуқуқ ҳимояси ташкилотининг билдиришича, диний экстремизмда айбланаётган А. А. Усмонов, А.Р. Усмонов, Ш. Шомаҳмудов, Ҳ. Ризаевлар ноқонуний диний, айирмачи ёки фундаменталистик ташкилотлар тузиш, иштирок этиш, шунингдек жамоат ҳавфсизлиги ва тартибига ҳавф солувчи материаллар тарқатиш, конституцион тузумга тажовуз ва терроризмда айбланишмоқда.

Диний маҳкумлар энг кўпчиликни ташкил этади

Ўзбек турмаларида диний маҳкумлар сони, собиқ совет республикаларидаги рақамларни қўшиб ҳисоблаганда ҳам энг кўпчиликни ташкил этади.

Айрим маълумотларга кўра, Ўзбекистон жазони ўташ муассасаларида 10 минг нафаргача бўлган диний маҳкумлар қолмоқда.

Уларни одатдагидек, қандайдир экстремистик ташкилотларга мансубликда айблашади, амалда эса бу диний адабиётларни ўқиганлик ва уларни биргаликда ўрганганликларини англатади.

Одатда «диндорлар»га қўйилаётган айблов хулосаларида айбланувчиларнинг айнан қайси жиноятни содир этганлигига аниқ жавоб йўқ. Уларнинг ортиқча тақводорликлари экстремистик ташкилотга мансубликларининг асосий исботи ҳисобланади.

Диний маърузаларни тинглаганликлари учун…

21 декабр куни давом этган суд айбловларида ҳам, барча судланувчилар Абдували қори Мирзаев ва бошқа таниқли дин арбобларининг ёзувларини тинглашгани асосий далил сифатида кўрилган.

Эслатиб ўтамиз, имом Абдували Мирзаев 1995 йили, исломий анжуманда иштирок этиш учун Москвага учиш олдидан Тошкент аэропорти паспорт назоратида махсус хизматлар томонидан ушланган. Шундан кейин унинг кейинги тақдири номаълумлигича қолмоқда.

Тошкент шаҳар судида бошланган суд мажлиси 2017 йилнинг 4 январидан давом этади.

Eltuz.com